Фота: сацсеткі фэсту.
На ўрочышчы Барык каля Гарадка распачаўся фэст вольнай беларускай культуры TUTAKA 2026. Пасля ўчорашняга «нулявога дня», калі госці ўладкоўвалі намётавы гарадок, сёння, 17 ліпеня, стартанула насычаная праграма: ад дыскусій пра будучыню Беларусі да вяртання рок-легенд Беласточчыны.
Сёлетні фэст, які ладзіць Фонд TUTAKA, абяцае стаць кропкай прыцягнення для беларусаў розных хваляў і пакаленняў.
Адной з чаканых падзей стане візіт Святланы Ціханоўскай, якая наведае паляну Барык, каб пагутарыць з гасцямі ў нефармальнай і цёплай атмасферы вольнага фэсту.
Музычнае напаўненне «Тутакі» сёлета здзіўляе гучнымі камбэкамі выканаўцаў, якіх даўно не было чуваць на вялікіх фэстах. Вяртаюцца: рок-гурт RIMA — галоўны голас беларускай Беласточчыны, які пакажа пасля доўгай паўзы, як падляшскі рок гучыць сёння, а таксама рэпер Vinsent.
Разам з імі на сцэну выйдуць іранічныя гарадскія рамантыкі з «Разбітага сэрца пацана» (РСП) і драйвовыя «Дзецюкі».
Пры гэтым на фэсце моцна прагучыць і самабытны жаночы голас: за гэты бок праграмы адказваюць этна-электронная «заклінальніца змей» Анастасія Рыдлеўская і смелы праект Chornabrova, якія пакажуць усю глыбіню сучаснага беларускага гуку.
Пры гэтым паляна Барык традыцыйна застаецца не проста канцэртнай пляцоўкай, а бяспечнай прасторай для супольнасці, дзе ваенная муштра касінераў і варштаты па інклюзіўнасці суседнічаюць са стэндамі беларускіх НДА і грамадскіх ініцыятыў.
13:20–14:30 (Namiot TAŁAKA) Колькі беларусаў у Еўропе? Даследаванне міграцыі ад Народных амбасадаў прэзентуюць Вадзім Мажэйка і Анастасія Свіркова.
13:20–14:50 (Namiot VIEDAKA) Не з нуля: як пачынаць жыццё ў эміграцыі пасля 40. Інтэрактыўная лекцыя Ірыны Сідорскай.
15:00–16:30 (Scena TUTAKA) «Гульня Мацкевіча». Размова з філосафам Уладзімірам Мацкевічам (мадэратары — П. Свярдлоў, А. Кныровіч).
17:00–18:30 (Scena TUTAKA) Круглы стол: ці магчымы польскі сцэнар 1989 года ў Беларусі? Дыскусія з удзелам П. Латушкі, Ф. Вячоркі, А. Брухана, Я. Вапы, А. Латышонка і М. Машкевіча.
18:30–20:00 (Namiot VIEDAKA) Беларусы ў Польшчы: ад адаптацыі да супольнасці. Дэбаты ў інтэрактыўным фармаце, дзе кожны глядач зможа стаць спікерам на роўных з Аляксандрам Кныровічам, Аляксеем Дзікавіцкім, Паўлам Станкевічам і іншымі.
10:00–13:00 (Scena TUTAKA) Каласы пад сярпом ШІ. Адкрыты запіс падкаста пра штучны інтэлект і беларускую культуру з удзелам Аляксея «АйЦіБарады» Картынніка, Я. Яфімава і Э. Гаўрус.
15:10–16:40 (Namiot VIEDAKA) Паўстанне Каліноўскага — што гэта было? Гістарычная лекцыя-размова ад Васіля Калача.
17.00-18.00 (Namiot VIEDAKA) Ці ёсць у беларусаў свая Царква? Гутарка са святаром Аляксандрам Кухтам пра будучыню праваслаўя.
14:00–20:00 Этнафотасесіі з Ларысай Шчыраковай: прымерайце традыцыйныя строі Гомельшчыны і зрабіце фота на памяць.
Лялькі-мотанкі («жаданніцы»); Саламяныя конікі са Святланай Кучук; Спевы прыпевак «пад язык» з Вольгай Барышнікавай; Тэатральны варштат для падлеткаў ад Андрэя Саўчанкі.
Тэатральная чытка:
Сцэнічнае прачытанне кнігі Аляксандра Чарнуха «Свінні» ад лабараторыі «Вольная сцэна».
Камерныя сустрэчы з музыкамі: пагутарыць і пажартаваць з артыстамі можна яшчэ да іх выхаду на сцэну. Сустрэча з Анастасіяй Рыдлеўскай, з гуртам RIMA.
Канцэрты першага дня пачнуцца пасля захаду сонца:
21:40–22:40 RIMA. Легендарны рок-гурт з Гарадка вяртаецца на сцэну пасля доўгай творчай паўзы.
22:40–23:40 Анастасія Рыдлеўская. Магічны перформанс на стыку індзі-попу, электронікі і фальклору.
23:40–02:20 ROOTS VIBRACJA Х DUB ROVAH. Рэгі, даб і магутныя басы да самай раніцы.
ВАЖНА: Сёлета правілы заезду змяніліся! Арганізатары звяртаюць увагу на тое, што першы абавязковы прыпынак для ўсіх — запраўка PRONAR (пін на мапе). Тут працуе check-in point, дзе трэба абмяняць або набыць квіток на бранзалетку. Без яе на тэрыторыю фэсту не пусцяць.
Пазнаёміцца з гідам па фэсту ад Reform.news можна тут.
Цалкам з праграмай можна тут.
Падпісвайцеся на культурныя навіны Reform.news у Telegram