"Бардаўская восень" 2022. Фота: tutaka.
З 27 па 29 кастрычніка на Падляшшы — у Бельску, Орлі і Беластоку — адбудзецца 28-мы фестываль «Бардаўская восень», арганізаваны фундацыяй Tutaka. У ім плануюць узяць удзел некалькі дзясяткаў выканаўцаў – бардаў і прадстаўнікоў тэатральных калектываў.
У 2022 годзе, пасля двухгадовага перапынку, фестываль вярнуўся ў абноўленым фармаце. Цяпер на ім гучыць не толькі музыка, але адбываюцца літаратурныя і тэатральныя выступленні.
27 кастрычніка ў 18.00 28-мы фестываль «Бардаўская восень» распачнецца ў Бельску Падляшскім
У Бельскім Доме культуры адбудзецца канцэрт — мастацкая дзея „Край”. На ім зайграе і заспявае Кацярына Ваданосава, а SandArt-мастачка Аляксандра Канафальская будзе маляваць карціны пяском непасрэдна падчас выступу. У канцэрце прымуць удзел Ганна Лепяшкевіч — цымбалы, Ігар Палынскі — гітара, Стэфанія Ваданосава — скрыпка.
Таксама адбудуцца ўручэнне Прэміі імя Міхала Анемпадыстава і дыскусія пра стан сучаснай беларускай літаратуры. Завершыцца вечар канцэртам гурта Relikt.
Пачатак а 18-й гадзіне ў Бельскім Доме культуры.
28 кастрычніка фестываль працягнецца ў Орлі.
Падзеі гэтага дня: канцэрт мастака і барда Алега Кабзара, дыскусія „Беларуская літаратура Падляшша», выступленне Змітра Вайцюшкевіча і WZ-Orkiestra.
Пачатак а 17-й гадзіне ў Гмінным Асяродку Культуры.
29 кастрычніка фінальны дзень «Бардаўскай восені» пройдзе ў Беластоку. У гэты дзень адбудуцца дзве прэм’еры — тэатральная і музычная — і адзін канцэрт.
Гэта прэм’ера спектакля „Святло ў цемры” Тутэйшага тэатра, прэм’ера праграмы „Арка” музычнага праекта ZUI і канцэрт гурта :B:N:.
Пачатак а 17-й гадзіне ў Беластоцкім Тэатры Лялек.
Уваход на ўсе мерапрыемствы бясплатны і без запрашэнняў.
Арганізатарам фестывалю «Бардаўская восень» з’яўляецца Фонд Tutaka. Мерапрыемства адбываецца ў межах праграмы #ArtPower Belarus Беларускай Рады Культуры і Дацкага Інстытута Культуры дзякуючы фінансавай падтрымцы Еўрапейскай Камісіі.
Сачыць за праграмай фестывалю можна будзе на сайце фонду Tutaka.