Музычны вечар у Музеі Вольнай Беларусі. Фота: facebook/freebelarusmuseum
У Музеі Вольнай Беларусі прайшоў незвычайны музычны вечар з удзелам дудароў школы дуды Dudy By, размешчанай у польскай сталіцы.
«Падзея адбывалася ў межах выставы «Строй» Кацярыны Ваданосавай і была натхнёная яе ідэямі. Музыка ахоплівала шырокі спектр стыляў — ад сярэднявечных мелодый да сучасных фолкавых і рокавых рытмаў. Гукі дуды арганічна спалучаліся з самымі рознымі музычнымі стылямі, ствараючы цікавы і непаўторны досвед для ўсіх, хто прыйшоў», — апісвае імпрэзу Музей Вольнай Беларусі.
Школа Dudy By запусціла аднайменны канал на Youtube з навучальнымі відэа для тых, хто хоча навучыцца граць на беларускай дудзе ці ўдасканаліць сваё майстэрства. На канале будуць выкладаць падрабязныя ўрокі ігры на беларускай дудзе — ад першых гукаў да складаных мелодый; расказваць пра гісторыю і ролю дуды ў абрадах, фальклоры і сучаснай музыцы; выкладаць інтэрв’ю з майстрамі, музыкамі і даследчыкамі, якія захоўваюць і адраджаюць традыцыю; дзяліцца майстар-класамі, лайфхакамі па доглядзе за інструментам і нават сакрэтамі яго вырабу.
Ужо можна азнаёміцца з некаторымі відэа: «Тэхніка і практыка грання», «Эксплуатацыя дуды», «Тэорыя музыкі і рытм», «Вакал».
Заняткі ў школе дуды Dudy By адбываюцца ў Музеі Вольнай Беларусі па выходных.
Падпісвайцеся на культурныя навіны Reform.news у Telegram