Музыка вялікае пачуццёвасці: Анастасія Рыдлеўская выпусціла новы альбом «Заклінальніца змей»

У новым альбоме Анастасія Рыдлеўская пасябравала са сваімі дэманамі, каб нарадзіць музыку вялікае пачуццёвасці.

Вобразны, цёмны, прыгожы, трансавы — трэці поўнафарматны альбом беларускай музыкі і мастачкі Анастасіі Рыдлеўскай Snake Charmer («Заклінальніца змей») — гэта канцэнтрацыя жаночай пачуццёвай энергіі, якая можа збіць вас з ног. На якой бы мове ні спявала Анастасія — беларускай, англійскай ці французскай — гэта «чысты» акт спакусы, дзе словы падпарадкоўваюцца «заклінальніцы» — і пераўтвараюцца ў заклёны.

Музыка Анастасіі Рыдлеўскай надзвычай вобразная — яна дасылае да брытанскага трып-хопу, амерыканскага індзі-попу, афрыканскіх матываў, беларускіх фолкавых элементаў, але ўсё, што ні называеш, будзе прыблізна і недакладна. Але ў гэтай размове са слухачом цікава тое, што аўтарка не хаваецца за кагосьці ці штосьці — скажам, пэўны музычны жанр. Выканаўца кажа пра сваё падсвядомае — страхі, дэманаў, фантомныя ці сапраўдныя болі, глыбінныя жаданні, і гэтая шчырасць зачароўвае — у кожным з нас таксама жывуць свае «змеі», якіх мы стрымліваем. У музыцы Рыдлеўскай цікава тое, што яна «прапускае» яе скрозь цела — і таму песні выканаўцы маюць такую моцную пачуццёвую сілу.

Альбом пачынаецца з «паўднёвагатычнага» хіта Dance on My Own, разважае пра ўладу ў стасунках у Petit Oiseau («Маленькай птушцы»), зацягвае ў транс на неверагодна музычнай, крыху атанальнай Limerence, заварожвае марской баладай пра каханне і смерць у «Кахаю», ашалела танчыць у Ltlmtf і выпраўляецца ў палёт у светлай Home. Гэта адкрытая і смелая музыка не баіцца быць непадобнай — і ў плане музычнага пошуку складана не тут узгадаць Б’ёрк з яе эксперыментамі. Не кажам тут пра падобнасць музыкі, а пра вольнасць пошуку і музычнасць. Snake Charmer прапаноўвае цалкам незвычайнае падарожжа ў «чорныя глыбіні», і гэта ў пэўным сэнсе свабода — дазволіць сабе яму адбыцца.

Слухаць Snake Charmer Анастасіі Рыдлеўскай можна тут.

Прэзентацыя альбома адбудзецца 20 красавіка ў варшаўскім клубе Hydrozagadka. 12 красавіка Анастасію Рыдлеўскую можа пачуць на фестывалі Sea You Music Showcase.