Музей Вольнай Беларусі набыў для сваёй калекцыі сакрэтны ліст ХVІІІ стагоддзя

Музей Вольнай Беларусі пашырае калекцыю, цяпер ён збірае экспанаты, гістарычныя артэфакты розных эпох, якія сведчаць пра шматвяковае змаганне беларускага народа за свабоду і годнасць.

Так, новым экспанатам музея стаў сакрэтны ліст берасцейскага ваяводы, барацьбіта супраць расійскага паглынання. Ліст быў напісаны ў 1773 годзе дзяржаўным дзеячам ВКЛ Янам Антоніем Гараіным, што займаў пасаду берасцейскага ваяводы. Ліст быў напісаны ва ўмовах, калі тэрыторыя Рэчы Паспалітай была наводненая расійскімі і прускімі войскамі, а паміж рознымі палітычнымі групоўкамі ўнутры краіны ішла зацятая барацьба, — тлумачаць у сацсетках музея.

Па гэтай прычыне аўтар ліста прымяніў шэраг мераў засцярогі, усведамляючы ўзровень кантролю за прыватнай карэспандэнцыяй у дзяржаве. Сваё імя на капэрце ён пазначыў як «J. Niaroh», што адкрывала таямніцу аўтара паслання пры прачытанні яго ззаду наперад – «J. Horain».

Ліст быў напісаны 17 ліпеня 1773 года, у тыя часы, калі праходзіў Падзяляльны Сейм, ініцыяваны Расіяй, Прусіяй і Аўстрыяй дзеля ўзаконьвання Першага падзелу Рэчы Паспалітай. У сваім лісце Ян Антоній Гараін кранае розныя палітычныя тэмы, сярод іншага – што яго самога падгаворваюць «падпісаць што-небудзь» (верагодна, размова пра ўзаконьванне Першага падзелу), але на гэта брэсцкі ваявода адзначае – «рэзалюцыі не бяру і на падобныя ўгаворы не згаджаюся».

Ян Антоній Гараін (польск.: Jan Antoni Horain, 1686 — 1777) — дзяржаўны дзеяч і ўраднік Рэчы Паспалітай. Пасаду берасцейскага ваяводы ён займаў з 1768 года і да сваёй смерці ў 1777 годзе. У 1768 годзе ён далучыўся да Барскай канфедэрацыі, якую пакінуў у 1772 годзе.

Набыццё артэфакта стала магчымым дзякуючы падтрымцы Музея Вольнай Беларусі з боку Амбасады Каралеўства Нідэрландаў у Варшаве.

Падпісвайцеся на культурныя навіны Reform.news у Telegram