Будынак Магілёўскага абласнога драматычнага тэатра падчас тэатральнага форуму «М.@rt.кантакт». Фота: t.me/minkultrb
Пачаўся продаж квіткоў на спектаклі Міжнароднага маладзёжнага тэатральнага форума «М.@rt.контакт», які традыцыйна пройдзе ў Магілёве з 20 па 27 сакавіка.
На фестывальнай сцэне будзе прадстаўлена класіка, якая «дыхае сённяшнім днём — пранізліва, канцэптуальна і сучасна», — заяўляюць арганізатары. Класіка – гэта творы Булгакава, Гогаля і Пушкіна, якія пераасэнсоўваюцца і ў беларускіх тэатрах таксама.
У праграму форуму ўвайшлі 17 спектакляў. Беларусь прадставяць шэсць тэатраў з Мінска, Магілёва і Гродна, ад Расіі заяўлены дзесяць калектываў.
Трэцяя краіна-ўдзельнік форуму – Казахстан: Рускі драматычны тэатр імя Дастаеўскага пакажа спектакль «Чэхаў. Вадэвілі». Гэты тэатр – сярод пяці дэбютантаў, упершыню запрошаных на магілёўскую пляцоўку.
Паводле еўрапейскай класікі спектакль пакажа Магілёўскі абласны тэатр лялек: калектыў удзельнічае з «Дон Кіхотам».
Па традыцыі у праграму форума ўключаны і адзін беларускамоўны спектакль, гэтым разам — «Хутар» Беларускага дзяржаўнага тэатра лялек, вобразнае пераасэнсаванне знакамітай аповесці Васіля Быкава «Знак бяды»..
Нагадаем, што «М.@rt.контакт» ладзіцца з 2006 года, да 2020 года ён праходзіў пад кіраўніцтвам дырэктара тэатра Андрэя Новікава і сапраўды быў міжнародным. Для параўнання: у 2019 годзе на «М.@rt.кантакт» прыехалі 23 тэатры і незалежныя тэатральныя калектывы з дзесяці краін.
Заснавальнікамі форуму з’яўляюцца Міністэрства культуры Рэспублікі Беларусь і Магілёўскі абласны выканаўчы камітэт. Тэатральны фестываль, паводле статута, ствараўся з мэтай «узбагачэнне нацыянальнай культуры перадавым міжнародным вопытам, стымуляванне творчай ініцыятывы; развіццё і ўмацаванне міжнародных культурных сувязяў, абмен духоўнымі і культурнымі каштоўнасцямі». Відавочна, што сёння «перадавы міжнародны вопыт» чэрпаецца толькі з адной крыніцы.
Падпісвайцеся на культурныя навіны Reform.news у Telegram