Франмент афішы. Фота: сацсеткі Віленскага беларускага музея.
Віленскі беларускі музей і Канадзкі фонд мясцовых ініцыятываў запрашаюць на незвычайны «Маленькі, утульны і няўтульны фэстываль жаночай літаратуры», які пройдзе з 18 па 22 лютага. Арганізатары абяцаюць прастору для супольнай прысутнасці, размоў пра фэмінітывы і нават «паэтычную аптэку».
Як адзначаюць стваральнікі, гэты фэстываль будзе адрознівацца ад звыклых літаратурных мерапрыемстваў, бо яго робяць не прафесійныя літаратары, а музейшчыкі. Галоўная мэта — стварыць атмасферу, дзе ёсць месца і для ўтульнасці, і для важных, часам «няўтульных» роздумаў.
Так, сёння фэстываль распачне інтэлектуальны вечар: а 18:30 мовазнаўца Вінцук Вячорка запрашае на размову пра фэмінітывы ў беларускай мове. Паралельна з гэтым пачне працу Жаночы клюб, дзе госці будуць разважаць пра вобразы жанчын у нашай культуры — ад Рагнеды да Лесі. На працягу ўсяго вечара будзе працаваць загадкавая «Паэтычная аптэка», дзе кожны зможа атрымаць свой літаратурны «рэцэпт».
У чацвер арганізатары абяцаюць «неўрачыстае» адкрыццё. Замест афіцыйных прамоў гасцей чакае Speed friending паводле беларускай літаратуры — выдатны спосаб пазнаёміцца з новымі людзьмі праз любімыя кнігі. Вечар працягнецца адкрытым мікрафонам жаночай паэзіі, дзе кожнае слова будзе мець вагу.
Пятніца пройдзе пад знакам візуальнага мастацтва. У 18:00 адкрыецца выстава архіўнай фатаграфіі, а Андрэй Антонаў прачытае лекцыю пра вэрнакулярныя (аматарскія) здымкі, якія захоўваюць памяць пакаленняў.
Субота пачнецца з заняткаў для дзяцей пра знакамітых жанчын у беларускай гісторыі. Увечары адбудзецца сустрэча з пісьменніцай Югасяй Калядой, а скончыцца дзень літаратурным стэндапам ад Марыі Пархімчык.
Нядзеля прапануе больш медытатыўны рытм. Для дзяцей рыхтуюць майстар-клас пра «лес нячысцікаў», а дарослых а 17:00 клічуць на «маруднае чытанне» з Андрэем Антонавым — каб паставіць кропку ў фэстывалі без мітусні.
Фэст чакае гасцей па адрасе: Vilniaus g. 20 (Віленскі беларускі музэй). Дазнацца больш пра яго праграму можна тут.
Падпісвайцеся на культурныя навіны Reform.news у Telegram