Дзеля аднаўлення дзейнасці выдавецтва Андрэя Янушкевіча ў Польшчы Беларуская Рада культуры запусціла магістрат «Кнігаўка», працягласцю 6 месяцаў.
На днях магістрат быў завершаны, а ў тэлекрам-канале «Беларускія магістраты» размясцілі справаздачу.
«За 6 месяцаў да магістрата далучылася 325 чалавек.
Сабраная сума на карысць “Кнігаўкі” — 103000 злоты (прыблізна 23 тыс. еўра).
За гэты час было выдадзена 13 кніг, наладжана рэгулярнае прадстаўніцтва беларускай кнігі на польскіх кніжных кірмашах, створаны сайт (хутка будзе запушчаны), запушчана ў распрацоўку некалькі важных кніжных серый.
Самая гучная з іх — дамова са Сцівенам Кінгам пра выданне ягоных кніг па-беларуску.
Таксама адноўленыя дамовы па працягу серый пра Гары Потэра і Ведзьмара, плануецца выданне «Валадара Пярсцёнкаў». Будуць у гэтым годзе і цікавыя кнігі ад беларускіх аўтараў.
Добрая палова гэтых спраў не рэалізавалася б так хутка, калі б не падтрымка магістратаў».
Задача праекта “Магістраты Культуры” — актывізацая культурнага жыцця беларускіх суполак у Польшчы праз запуск сістэмы самаарганізацыі магістратаў. Магістрат – гэта суполка ахвярадаўцаў, якія дамаўляюцца цягам канкрэтнага перыяду вызначанаю сумаю грошай падтрымліваць перспектыўны праект беларускай справы альбо дапамагаць развязанню пэўнай праблемы.
Цяпер існуюць два актуальныя магістраты — гэта падтрымка падлеткавага клуба ў Вроцлаве і платформы аўдыяэкскурсіяў па Беларусі, Літве і Польшчы.
Падпісвайцеся на культурныя навіны Reform.by у Telegram