​Яшчэ адзін летні фэст аб’явіў сваю праграму — у Кракаве адбудзецца Piknik LTCŃ (Пікнік Летуцень)

Для тых, хто не трапіў на Tutaka, Varushnyak ці Huchna Fest, Кракаў прапаноўвае атрымаць асалоду ад лета, музыкі і сустрэч на Piknik LTCŃ (Пікнік Летуцень) — open air беларускай культуры, які адбудзецца 27 ліпеня ў Park Jordana. У хэдлайнерах фэсту — «Разбітае сэрца пацана» і LEIBONIK, з актыўнасцяў — кірмаш майстроў і больш за дзесяць разнастайных пляцовак, сярод якіх, напрыклад: літаратурная — ад Pradmova, спартыўная — з Аляксандрам Івуліным, дзіцячая — з Маляванычам, і «ўнікальная DJ-Art-VR-пляцоўка, якой не бачыў аніводны фестываль».

«Наш фестываль — гэта свята для ўсіх узростаў, дзе кожны і кожная знойдзе штосьці для сябе: ад дзіцячай пляцоўкі і фудкорту да DJ-art-VR-зоны і этнастрэфы ці літаратурнай прасторы. Наша мэта — аб’ядноўваць беларусаў і беларусак, умацоўваць дыяспару ў Кракаве і разам ствараць яркія праекты», — прадстаўляе Piknik LTCŃ арганізатары — беларускае таварыства «Крок», якое ладзіць культурныя мерапрыемствы ў Кракаве.

Гэта ўжо пяты — юбілейны — фэст беларускай дыяспары, і адмыслова да яго каманда Пікніка падрыхтавала розныя цікавосткі.

Новым на фестывалі сёлета будзе этнастрэфа з беларускім каларытам — пляцоўка, якая паглыбіць удзельнікаў фэсту ў беларускія (і не толькі) традыцыі ды спевы.

Тут плануюцца:

• Фолк-джэм — адкрытая сцэна для ўсіх ахвотных,
• Выступы спеўных гуртоў: Cór Jednym Głosem (PL), Lela (UA), Laleja (BY),
• Выступ гурта афрыканскай перкусійнай музыкі Changa,
• Варкшопы па беларускіх танцах з капэлай Po Drodze,
• Канстанцiн Мужаў з перформансам стварэння этнаскульптуры,
• Прыпевачны батл, у якім зможа паўдзельнічаць кожны ды кожная,
• Этна-DnB ад Akvaleria i DJ T-Trider.

Таксама Piknik LTCŃ заявіў пра супрацоўніцтва з фэстам Pradmova — і на пікніку чакаецца праца літаратурнай пляцоўкі.

Там будзе:

• Сустрэча з «Кніжным Возам»,
• Прэзентацыя кніг «Хто жыве ў гаражы» і «Стукі-грукі, што за гукі» з мастачкай Воляй Кузьміч (выдавецтва Gutenberg Publisher),
• Прэзентацыя кнігі «Д’ябал з сёмага класа» Карнэля Макушыньскага (Gutenberg Publisher),
• Літаратурны квіз «Прадмова»,
• Размова пра спадчыну Васіля Быкава разам з перакладчыцай Янай Бернатовіч і выкладчыцай, рэдактаркай, перакладчыцай Марынай Казлоўскай,
• «5 кніг па гісторыі Беларусі, якія яшчэ не напісаныя»: размова з гісторыкам Цімохам Акудовічам,
• Музычны нонфікшн: размова з Аляксандрам Чарнухам.

А яшчэ на фэсце будуць працаваць: вялікая дзіцячая пляцоўка з насычанай праграмай гульняў і заняткаў, спартыўная пляцоўка, дзе Аляксандр Івулін будзе ладзіць міні-турнір па футболе, пляцоўка салідарнасці з намётамі сацыяльных ініцыятываў, адукацыйная пляцоўка з інтэрактыўнымі выступамі, квэсты, кірмаш майстроў і шмат чаго іншага.

Фішка Пікніка — «унікальная DJ-Art-VR-пляцоўка, якой не бачыў аніводны фестываль» пакуль застаецца пад покрывам — яе актыўнасці яшчэ не аб’яўленыя.

Музыка. Назавем лайн-ар фестывалю:

Галоўная сцэна: MANDZIK, Groove Dealer, Разбітае Сэрца Пацана ды LEIBONIK.

А яшчэ чакаюцца выступы: Kornej, Mustelide ды іншых музыкаў.

Сёлета на фэсце працуюць тры музычныя пляцоўкі, звяртае ўвагу каманда.

Сачыць за праграмай Пікніка можна тут.

Важна адзначыць, што ініцыятыва Piknik LTCŃ з’яўляецца валанцёрскім праектам і існуе за лік ахвяраванняў.

«Усе сабраныя грошы ідуць выключна на арганізацыю фестывалю: арэнду апаратуры і абсталявання (сцэна, генератары, намёты, сталы ды стулы, музычная апаратура і г.д.), падзякі артыстам, інвентар для конкурсаў і розных пляцовак Пікніка. Каманда Пікніка не атрымлівае аніякіх ганарараў», — адзначаецца на Zrzutka.pl, дзе адкрыты збор на культурнае мерапрыемства.

Уваход на Piknik LTCŃ вольны.

Фестываль арганізуе таварыства «Крок» пры падтрымцы адміністрацыі горада Кракава і Goethe-Institut im Exil.

Падтрымаць каманду фэсту можна тут.

Падпісвайцеся на культурныя навіны Reform.news у Telegram