Фота: сацсеткі гурта.
Гурт Relikt абявіў пра старт гастроляў па Польшчы і Літве. 27 сакавіка ў Беластоку адбудзецца першы канцэрт progressive rock-калектыву ў падтрымку новага альбома «Рамантызм».
Постметал-бэнд наведае сем гарадоў: Вільнюс, Варшава, Гданьск, Кракаў, Уроцлаў, Познань уключна з Беластокам у сакавіку і красавіку. Сёння каманда распачала продаж квіткоў на канцэрты.
2 лютага Relikt выпусціў свой дзевяты альбом «Рамантызм», у якім злучыў свой фірмовы прагрэсіўны гітарны саунд з больш лёгкай стылістыкай. Пераключэнне рытмавых рэгістраў, шматгалоссе, крыху электронікі, выкарыстанне гітарнай гукавой палітры — усё разам выкрышталізавала свежае аблічча беларускага progressive rock.
«У альбоме шмат фэнтэзійнасці і мары, казкі і міфа — і пры гэтым сапраўднага пачуцця, тугі, якая не дае выказванню сысці ў гульню. І да ўсяго альбом вельмі прыгожы ды цудоўна запісаны — што робіць яго адным з прэтэндэнтаў на найлепшую плытку года», — працытуем водгук культурнага аглядальніка Reform.news на «Рамантызм».
Падрабязней пра графік гастроляў можна дазнацца тут.
Падпісвайцеся на культурныя навіны Reform.news у Telegram