Голас драматургіі: абвешчаны конкурс «Dramatyzacyja’25» для беларускіх аўтараў у эміграцыі

Фота: сацсеткі Беларускага інстытута тэатра.

Абвешчаны старт конкурсу сучаснай беларускай драматургіі «Dramatyzacyja’25». Ініцыятыва Беларускага інстытута тэатра створана з мэтай прасоўвання новых тэкстаў, каб голас драматургаў з Беларусі быў пачуты шырокай міжнароднай аўдыторыяй.

Арганізатары запрашаюць беларускіх аўтараў да ўдзелу ў конкурсе, які закліканы падтрымаць незалежную сцэну.

Хто можа ўдзельнічаць: беларускія драматургі незалежна ад краіны пражывання.
Ананімнасць: тэксты можна дасылаць як з указаннем аўтарства, так і ананімна.
Мовы: прымаюцца тэксты на беларускай, рускай і польскай мовах.
Дэдлайн: прыём прац працягваецца да 20 студзеня 2026 года.

Пасля працы журы адабраныя п’есы будуць прадстаўлены публіцы ў фармаце перфарматыўных чытанняў на спецыяльным афлайн-мерапрыемстве ў Польшчы.

Пераможцы конкурсу атрымаюць грашовую ўзнагароду.

Электронны адрас для адпраўкі тэкстаў: dramatyzacyja@proton.me.

Беларускі інстытут тэатра быў створаны Беларускім тэатральным кам’юніці два гады таму з мэтай кансалідацыі тэатральных дзеячаў па абодва бакі мяжы, адвакацыі беларускага незалежнага тэатра ў эміграцыі, і яго прамоцыі. Адзін з праектаў інстытута — серыя анлайн-дыскусій #BIT_talks, збор архіву тэатра за 2020-2023 гады.

Сачыць за навінамі конкурсу можна тут.