Кадр з фільма "Пад шэрым небам".
Фільм «Пад шэрым небам» беларуска-польскай рэжысёркі Мары Тамковіч у сакавіку выпраўляецца ў тур па Вялікабрытаніі ў межах Польскага кінафестывалю Kinoteka.
Поўнаметражны дэбют, натхнёны гісторыяй Кацярыны Андрэевай і Ігара Ільяша, будзе дэманстравацца ў Бірмінгеме, Лідсе, Ньюкасле, Нотынгеме, Гуле… Паказ у Лондане, на якім будзе прысутнічаць Мара Тамковіч, адбудзецца на Дзень Волі — 25 сакавіка — у слынным Цэнтры «Барбікан».
Нагадаем, што ігравая стужка, створаная за сродкі Польскага кінаінстытута, распавядае гісторыю беларускіх журналістаў на фоне пратэстаў 2020 года і ўзмацнення рэпрэсій. Мара Тамковіч фіксуецца на стасунках галоўных герояў — журналістаў Лены і Ігара, якія, трапіўшы ў махавік рэпрэсій лукашэнкаўскага рэжыму, знаходзяць адно ў адным падтрымку і надзею жыць у страшных і складаных абставінах.
«Асабістая сумленнасць і важнасць справядлівасці знаходзяцца ў цэнтры гэтага выбітнага дэбютнага фільма», — анансуюць карціну, якая была прызнана найлепшым дэбютам на Фестывалі польскага кіно ў Гдыні, на сайце «Кінатэкі».
23-ці фестываль польскага кіно Kinoteka пройдзе ў Лондане з 6 сакавіка па 25 красавіка 2025 года. У яго межах будзе дэманстравацца сучаснае польскае кіно, створанае за апошні год. Сеансы такіх фільмаў як «Пад шэрым небам», «Гэта не маё кіно», «Сімона Косак» ды іншых стужак адбудуцца на такіх пляцоўках як BFI Southbank, BFI IMAX, Barbican Centre, The Garden Cinema, Cine Lumiere і Інстытут сучаснага мастацтва (ICA).
Набыць квіткі на паказ у Цэнтры «Барбікан» можна тут. Сачыць за раскладам фестывалю тут.
Падпісвайцеся на культурныя навіны Reform.news у Telegram
