Фото: pixabay.com
“Шуфлядка” — першы конкурс рукапісаў на беларускай мове, які з новага года запусціў Фестываль інтэлектуальнай кнігі PRADMOVA. На сёння журы вызначыла шорт-ліст у трох намінацыях і запрашае выбраць лепшы рукапісны твор чытачоў.
На конкурс быў дасланы 61 рукапіс ад 46 аўтараў і аўтарак. «Рукапісаў ад пісьменнікаў болей, чым ад пісьменніц — 36 супраць 25», — падзяліліся статыстыкай арганізатары і дадалі, што аўтараў хоць і было менш па колькасці — 22 супраць 24 аўтарак, але рукапісаў яны дадалі больш.
Сёння на старонцы фестывалю ў сацсетках ідзе глядацкае галасаванне за найлепшы дасланы тэкст.
У намінацыі «Нон-фікшн і дакументальная проза» сярод шорт-лістараў прадстаўлены ўрыўкі з рукапісаў: «Зона лёну», «Слюнькоў. Палітычная біяграфія» і «Там не кажуць».
У намінцыі «Масавыя жанры» галасаваць можна за тэксты з твораў: «Бясконцы дзень», «Жыццё ў дванаццаці апавяданнях», «Смерць прапагандыста»,» Усе (ці не?) жыцьці Іванова».
І сярод шорт-лістараў у намінацыі «Дзіцячая і падлеткавая кніга» ажно восемь тэкстаў: «Арцік і магічны ліхтарык. Калядная ёга для дзетак», «Бяры і ідзі», «Джа. Легенда аб забраным сэрцы», «Дрэва і ліхтар», «Перапёлкавы Кароль», «Плюшавы Лёкса», «Скарбы лабірынта», «Хованкі з Анёлам».
Пасля таго, як будзе вызначаны пераможца ў кожнай намінацыі ад гледачоў, арганізатары адкрыюць імёны і прозвішчы аўтараў. Пакуль іх імёны зашыфраваны нават для журы.
Арганізатары падзяліліся меркаваннямі сябраў журы, якія абіралі рукапісы ўдзельнікаў конкурсу ў шорт-лісты.
— Пасля знаёмства з рукапісамі, дасланымі на першы конкурс “Шуфлядка”, магу вылучыць чатыры заканамернасці. Першае: яшчэ рана казаць пра 2020 год у мастацкай літаратуры. Лепшае, што пакуль даводзілася бачыць «на тэму», гэта публіцыстыка, усё астатняе – агіткі са знакам «плюс». Рукапісы канкурсантаў выключэннем не сталі.
Другое: людзі дасюль упэўненыя, што літаратура – гэта пра што, а не як. Пакуль не засвоіцца гэтая простая ісціна, руху не будзе.
Трэцяе: дзіцячую літаратуру лічаць чымсьці другарадным і лёгкім для выканання. І гэта, як той казаў, фатальная памылка.
Чацвёртае: пісьмо застаецца найпапулярнейшым сродкам псіхатэрапіі. Што цалкам легальна, аднак варта памятаць, што пладамі гэтай тэрапіі дзяліцца неабавязкова.
P.S. Але конкурс цікавы, добра, што ён ёсць, — падзяліўся сваімі ўражаннямі адзін з экспертаў.
— Прыемна здзіўляе колькасць рукапісаў, хапае неабыякавых да пісання людзей. Пры гэтым перавага за літаратурай для дзяцей, відаць, самімі бацькамі сапраўды адчуваецца недахоп сучасных дзіцячых кніг.
Разам з тым бачна, што беларускай мовай канкурсанты часта валодаюць на не вельмі добрым узроўні, імаверна, для кагосьці гэта наогул першыя спробы пісаць па-беларуску. Гэта, з аднаго боку, праблема, бо і актуальным, і будучым пісьменнікам усё ж варта дасканаліцца, а з другога боку — гэта прыкмета таго, што жаданне і патрэба пісаць па-беларуску з’яўляецца не толькі ў купкі былых студэнтаў філфаку, а гэта не можа не радаваць, — такім было меркаванне яшчэ аднаго сябра журы.
Нагадаем, што конкурс рукапісаў быў створаны фестывалем інтэлектуальнай кнігі PRADMOVA з мэтай падтрымкі аўтараў — і пачаткоўцаў, і тых, хто піша даўно. Таксама форум прагне падвысіць цікавасць чытачоў і людзей слова да масавых жанраў, ды, натуральна, садзейнічаць публікацыі рукапісаў – з’яўленню новых кніг.
Згодна з умовамі конкурсу, фіналісты «Шуфлядкі» акурат атрымаюць магчымасць публікацыі свайго тэксту.
Імёны пераможцаў мусяць быць названы неўзабаве.
Падпісвайцеся на культурныя навіны Reform.by у Telegram