Беларускія арганізацыі ў Варшаве атрымаюць больш магчымасцей для супрацоўніцтва і падтрымкі

Прадстаўніцтва па нацыянальным адраджэнні Кабінета паведаміла аб выніках рабочай сустрэчы, якая прайшла ў мэрыі Варшавы з удзелам в.а. прадстаўніка Кабінета Паўла Баркоўскага, прадстаўнікоў Беларускай Рады культуры і фонду «Тутака», дырэктара Бюро культуры Варшавы Артура Юзьвіка, спецпрадстаўніка МЗС Польшчы па справах Беларусі Адама Халацінскага, а таксама супрацоўнікаў Бюро міжнароднага супрацоўніцтва.

Падчас сустрэчы беларускі бок звярнуўся да польскіх адмыслоўцаў з наступнымі прапановамі:

магчымасць стварэння шматфункцыянальнай прасторы для беларускіх арганізацый у Варшаве;
даступнасць памяшканняў на некамерцыйных умовах;
інфармаванне пра стыпендыі і конкурсы з польскага боку;
супрацоўніцтва з польскімі культурнымі інстытуцыямі, у тым ліку фармат адукацыйных візітаў;
кансультацыі пра патрэбы беларускай супольнасці;
візавая падтрымка творцаў з Беларусі – пакуль у індывідуальным парадку праз рэкамендацыі давераных арганізацый, з перспектывай пераходу да сістэмных рашэнняў.

«Беларуская супольнасць у Варшаве мае патэнцыял для стварэння паўнавартаснай культурнай прасторы. Але патрэбна каардынацыя, ініцыятыва знізу і разуменне, што гарадскія механізмы падтрымкі адкрытыя – варта толькі карыстацца імі», — заахвочвае да супрацоўніцтва з польскімі арганізацыямі Павел Баркоўскі.

Па выніках сустрэчы польскі бок падрыхтаваў комплексны дакумент з пералікам інструментаў і кантактаў для беларускіх арганізацый, зарэгістраваных у Польшчы.

Пазнаёміцца з яго версіяй на беларускай мове можна тут.

Прадстаўніцтва таксама звяртае ўвагу на магчымасці:

удзелу беларускіх ініцыятыў у профільных камісіях пры Бюро культуры Варшавы;
падпіскі на штотыднёвую рассылку Бюро міжнароднага супрацоўніцтва;
кансультацый з Варшаўскай абсерваторыяй культуры і Старамескім домам культуры, якія падтрымліваюць міжкультурнае супрацоўніцтва.

Зацікаўленыя арганізацыі могуць звяртацца ў Прадстаўніцтва па нацыянальным адраджэнні Кабінета для каардынацыі і атрымання дадатковай інфармацыі.