European Ceramic Context 2024 — гэта 9-я трыенале сучаснай еўрапейскай керамікі і шкла на востраве Барнхольм у Даніі. 64 керамісты з 28 еўрапейскіх краін паказалі сваю эксперыментальную кераміку. Важным аспектам гэтага праекта з’яўляецца экалагічны падыход.
Беларуская мастачка Ганна Мядзведзева атрымала галоўны прыз за аб’ект пад назвай «Восеньскі краявід». Гэты твор просты і складаны адначасова, — тлумачыць журы ў сваім абгрунтаванні. «Просты таму, што гэта ўсяго толькі абпаленая гліна, матэрыял, з якім мы працуем са спрадвечных часоў, матэрыял, вядомы і зразумелы большасці людзей.
Складаны таму, што ў руках Мядзведзевай гліна, здаецца, кідае выклік сваёй матэрыяльнасці, як быццам яе стварыла сама прырода. Тонкая і заблытаная павуціна структуры твора здаецца бясконцай, але мы не можам вызначыць, што гэта такое. Мядзведзева выдатна разбіраецца ў абраным матэрыяле і ў дасканаласці валодае працэсамі, якія дазваляюць гліне «спяваць». Гэтая маленькая скульптура падобная на цуд. Яна загадкавая і прыцягальная і пераносіць нас у свет, які мы да канца не разумеем. Гэта абуджае ў нас пачуццё далікатнасці і ўяўленні аб клопаце і абароне не толькі ў адносінах да гэтага невытлумачальнага аб’екта, але і да ўсяго свету ў цэлым, у якім ён існуе».
Ганна Мядзведзева — выпускніца Беларускай акадэміі мастацтваў, выпрацавала ўласны метад стварэння краявідаў — устойлівых формаў, дзе пра краявід нагадваюць фактуры, структуры, светлацень, падгледжаныя ў канкрэтных месцах. Апошнім часам мастачка стварае скульптурныя аб’екты на трох ножках, увасабляючы тэму балансавання і стабільнасці ў складаныя часы.
Творы трыенале прадстаўлены на дзвюх выставах — у Цэнтры рамёстваў і музеі Hjorths Fabrik, якія будуць працаваць да 7 лістапада.
Падпісвайцеся на культурныя навіны Reform.news у Telegram
Если вы нашли ошибку, пожалуйста, выделите фрагмент текста и нажмите Ctrl+Enter.