Международный уголовный суд. Фото: icc-cpi.int
ЗША ўводзяць санкцыі ў дачыненні да Міжнароднага крымінальнага суда (МКС) за пераслед сваіх грамадзян.
ЗША забараняюць фінансавыя аперацыі з МКС, каб пазбавіць суд рэсурсаў і паралізаваць яго дзейнасць, паведамляе Дзярждэп.
«Амерыка ніколі не далучалася да гэтага суда. Ён нам не патрэбны. І мы не хочам мець з ім справы», — заявіў дзяржсакратар ЗША Марка Рубіа.
Рубіа заявіў, што МКС дзейнічае па-за законам, і паабяцаў, што ЗША прыменяць далейшыя меры, калі суд не будзе ўлічваць пазіцыю Вашынгтона.
«Нягледзячы на іх бяздзейнасць, мы па-ранейшаму спадзяёмся на дыпламатычнае рашэнне. Мы распрацавалі гэтыя меры такім чынам, каб даць дзяржавам-удзельніцам магчымасць правесці перамовы і прапанаваць рашэнне, якое дазволіць ліквідаваць нашы асцярогі. Калі гэтыя намаганні не прынясуць вынікаў, мы працягнем адпаведным чынам карэктаваць свае дзеянні. Наша пасланне яснае: Злучаныя Штаты і іх грамадзяне не падпадаюць пад юрысдыкцыю МКС», — падкрэсліў дзяржсакратар ЗША.
ЗША пагражаюць знішчыць МКС, калі крымінальны пераслед амерыканцаў працягнецца.
«Альбо МКС спыніць пагражаць, альбо мы пакончым з МКС. Мы чакаем, што нашы саюзнікі, многія з якіх уваходзяць у склад МКС і разлічваюць на амерыканскіх вайскоўцаў у пытаннях сваёй абароны, утаймуюць гэты суд.
Калі яны гэтага не зробяць, Злучаныя Штаты працягнуць кампанію па дэмантажы МКС — цаглінка за цаглінкай, — пакуль амерыканцам больш нішто не будзе пагражаць», — заявіў Рубіа.
Міжнародны крымінальны суд заснаваны на аснове Рымскага статута. Гэта пастаянны міжнародны судовы орган для прыцягнення да адказнасці асоб, абвінавачаных у генацыдзе, злачынствах супраць чалавечнасці, ваенных злачынствах і злачынстве агрэсіі. МКС разглядае справы ў выпадках, калі нацыянальныя судовыя сістэмы не могуць або не хочуць праводзіць расследаванне і ажыццяўляць крымінальны пераслед.
ЗША не з’яўляюцца ўдзельнікам Рымскага статута і не прызнаюць юрысдыкцыю МКС.
9 кастрычніка 2026 года былая суддзя МКС Наві Пілэй атрымала Нобелеўскую прэмію міру.