Фото: Беллесбумпром
Зняцце амерыканскіх санкцый з канцэрна “Беллесбумпрам” палегчыла разлікі ў доларах за прадукцыю дрэваапрацоўкі. Пра гэта паведаміў старшыня канцэрна Аляксандр Пшонны.
“Так, нам не адкрылі цалкам усе напрамкі для далейшага нарошчвання экспартных паставак, але тым не менш гэта дазваляе палепшыць праходжанне плацяжоў у доларах ЗША для нашых прадпрыемстваў. У гэтым плане былі пэўныя праблемы. Спадзяюся, што з улікам зняцця абмежаванняў гэтая сістэма плацяжоў запрацуе лепш і адаб’ецца на далейшым развіцці экспарту нашых прадпрыемстваў”, – сказаў ён, перадае БелТА.
Разам з тым, паводле яго слоў, складанасці з правядзеннем плацяжоў яшчэ застаюцца. Пшонны таксама заявіў, што канцэрн сёлета ўжо нарасціў экспарт на 9%.
“Нават нягледзячы на абмежаванні з боку Захаду, мы прыбаўляем у гэтым напрамку. У першую чаргу – за кошт паставак у дружалюбныя краіны. У топ-5 уваходзяць Расійская Федэрацыя, Азербайджан, Казахстан, Узбекістан і Кітай. І на перспектыву бачым, што экспарт яшчэ павялічыцца. Так, застаюцца некаторыя праблемы з лагістыкай, ёсць складанасці з правядзеннем плацяжоў, але мы працягваем працу”, – сказаў кіраўнік “Беллесбумпрама”.