Фото: president.gov.ua
Прэзідэнт Украіны Уладзімір Зяленскі заклікаў дэпутатаў Вярхоўнай Рады як мага хутчэй прыняць рашэнне аб звальненні генпракурора Руслана Краўчанкі.
“У гэтага генеральнага пракурора ёсць толькі адзін шлях: звальненне з пасады. Менавіта гэта я яму і сказаў. Украіна бачыла ўсе прычыны. Калі ён лічыць, што гэта палітычны ціск, няхай так і называе. Прашу парламентарыяў падтрымаць гэта звальненне неадкладна”, – заявіў Зяленскі.
Нагадаем, у пачатку верасня Нацыянальнае антыкарупцыйнае бюро Украіны і Спецыялізаваная антыкарупцыйная пракуратура заявілі пра выкрыццё злачыннай арганізацыі ў Офісе генеральнага пракурора. Паводле версіі следства, удзельнікі групоўкі забяспечвалі “крышаванне” сеткі махлярскіх кол-цэнтраў і займаліся легалізацыяй атрыманай маёмасці.
Краўчанка ў выніку падаў у адстаўку пасля сустрэчы з прэзідэнтам, але яго звальненне яшчэ не зацвердзіла Вярхоўная Рада.
Сёння раніцай ён апублікаваў у сацсетках відэа, у якім заявіў, што падпісаў падазрэнне дырэктару Нацыянальнага антыкарупцыйнага бюро Сямёну Крываносу і заклікаў яго сысці ў адстаўку. Паводле слоў генпракурора, кіраўнік НАБУ падазраецца ў падробцы афіцыйных дакументаў для атрымання неправамернай выгады ў асабліва буйным памеры.
Яму таксама інкрымінуюць фіктыўнае ўсынаўленне дзіцяці, якім той нібыта спрабаваў штучна стварыць падставы для пазбягання адказнасці ў судзе. Яшчэ адно падазрэнне Краўчанка падпісаў у дачыненні да асобы, блізкай да кіраўніка Спецыялізаванай антыкарупцыйнай пракуратуры Аляксандра Кліменкі.
Гаворка ідзе пра ўплыў на суддзяў Вышэйшага антыкарупцыйнага суда, прапанову ім неправамернай выгады, а таксама садзейнічанне ва ўхіленні ад мабілізацыі. Краўчанка сцвярджае, што менавіта гэтая справа і стала сапраўднай прычынай начнога ператрусу ў Офісе генеральнага пракурора.