Фото: t.me/dsns_telegram
Колькасць загінулых у выніку расійскага авіяўдару па пасёлку Камышаваха Запарожскага раёна 2 лістапада павялічылася да 55 чалавек. Пра гэта паведамляе Дзяржаўная служба Украіны па надзвычайных сітуацыях (ДСНС).
За мінулыя суткі ратавальнікі выявілі і дасталі з-пад завалаў целы і парэшткі яшчэ 9 загінулых. Пошукавыя работы працягваюцца. Ратавальнікі і кінолагі ДСНС разбіраюць разбураныя канструкцыі і абследуюць тэрыторыю, нягледзячы на складаныя ўмовы і пагрозу паўторных расійскіх удараў, адзначылі ў ведамстве.
Галоўнае ўпраўленне разведкі Мінабароны Украіны заявіла аб устанаўленні расійскіх вайскоўцаў, датычных да авіяўдару па школе ў Камышавасе. Паводле даных ведамства, удар спланаваў палкоўнік Фёдар Зубакаў, начальнік групы агнявога паражэння штаба расійскай групоўкі войскаў «Дняпро». Для атакі былі задзейнічаны чатыры самалёты Су-34.
ГУР таксама ўстанавіла асобы 6 расійскіх лётчыкаў, якія, як сцвярджаецца, удзельнічалі ў нанясенні ўдараў. Гэта капітаны Сяргей Елісееў і Дзмітрый Звераў, старшыя лейтэнанты Радзівон Плотнікаў, Мікіта Ігнацьеў і Максім Сакаленка, а таксама лейтэнант Вадзім Перахрэст. Асобы членаў экіпажа яшчэ аднаго самалёта ўстанаўліваюцца.
Як сцвярджае ўкраінская разведка, да атакі прыцягвалася тактычная авіяцыйная група №5 спецыяльнай баявой групы авіяцыйнага рэзерву Генштаба УС Расіі, сфарміраваная на базе 11-га змешанага авіяцыйнага палка і 559-га бамбардзіровачнага авіяцыйнага палка.
Нагадаем, 2 лістапада каля 09:45 дзве расійскія кіраваныя авіябомбы трапілі ў гімназію «Джерело» ў Камышавасе, разбурыўшы спартыўную залу і гаспадарчы будынак. Прыкладна праз гадзіну расійская авіяцыя скінула яшчэ адну авіябомбу ФАБ-3000 на падземнае памяшканне гімназіі, дзе знаходзіліся пункт дапамогі насельніцтву і сховішча для мясцовых жыхароў.
Больш за 50 чалавек лічацца зніклымі без вестак. Пошукава-выратавальныя работы працягваюцца. Частку выяўленых цел пакуль не ўдалося апазнаць. У сваякоў зніклых без вестак узялі ўзоры ДНК для ідэнтыфікацыі загінулых. Паводле папярэдніх ацэнак украінскай разведкі, пад заваламі могуць заставацца целы яшчэ каля 30 чалавек.
У чэрвені ў Камышавасе правялі абавязковую эвакуацыю дзяцей. Паліцэйскія вывезлі з пасёлка 11 непаўналетніх. Абавязковая эвакуацыя дарослага насельніцтва не абвяшчалася, аднак мясцовыя ўлады аказваюць дапамогу ахвотным выехаць у больш бяспечныя раёны.
З пачатку года паліцэйскія эвакуіравалі з Камышавахі 166 чалавек, у тым ліку 77 пажылых і 33 маламабільных грамадзян.
Паводле апошніх прыведзеных даных, у пасёлку заставаліся каля 200 жыхароў.