Кадр из рекламы MaxLine "крути гуся"
У Беларусі падрыхтаваны праект змяненняў у закон аб рэкламе, які прадугледжвае дадатковыя абмежаванні на рэкламу азартных гульняў. Ён ужо накіраваны на ўзгадненне. Пра гэта ў эфіры СТБ паведаміла кансультант Міністэрства антыманапольнага рэгулявання і гандлю Юлія Хвалюк.
“У МАРГ аператыўна распрацаваны праект закона аб рэкламе, які накіраваны на ўзгадненне з зацікаўленымі, а таксама ўрадам, які прадугледжвае змяненне закона аб рэкламе. Як у частцы зместу такой рэкламы ігральных устаноў, азартных гульняў, у тым ліку віртуальных ігральных устаноў, так і па месцах яе размяшчэння і распаўсюджвання.
У прыватнасці, прадугледжваецца абавязковая наяўнасць папераджальнага надпісу аб адсутнасці гарантыі выйгрышу і рызыцы фінансавых страт. У тым ліку прадугледжваецца поўная забарона на размяшчэнне рэкламы ігральных устаноў, у тым ліку віртуальных ігральных устаноў і ігральнага бізнесу ў вонкавай рэкламе, выключэнне складаюць толькі шыльды, шыльды рэкламнага характару на транспартных сродках, у салонах транспартных сродкаў, на прыпыначных пунктах грамадскага транспарту, на аўтавакзалах, чыгуначных вакзалах, у тым ліку ў шматкватэрных жылых дамах, гандлёвых аб’ектах, аб’ектах грамадскага харчавання, гандлёвых цэнтрах”, — сказала яна.
Нагадаем, 10 верасня Аляксандр Лукашэнка абурыўся рэкламай ігральнага бізнесу, у прыватнасці рэкламай букмекерскай кампаніі MaxLine з гусём.
«Як яны называюцца ў вас: «круці гуся» — усюды вы паразвешвалі гэтыя рэкламы. Ужо дайшло да таго, аказваецца, гэта мая сям’я гэтым займаецца. Мая сям’я… Якраз мяне трэціруюць кожны дзень. Яны мяне душаць, каб я на гэта ўвагу звярнуў. Што робіцца ў краіне: у нас усе гуся гэтага круцяць», — сказаў ён тады.
Ён даручыў разабрацца з рэкламай азартных гульняў.
“Але гэта не значыць, што ўся краіна завешаная і абвешаная, асабліва ў Кухарава, усімі гэтымі плакатамі і гэтымі рэкламамі. У нас жа чыстая, прыгожая, для народа краіна”, — казаў Лукашэнка.