У Беларусі вырасла колькасць загінулых ад забойстваў

У Беларусі за 10 месяцаў 2026 года павялічылася колькасць загінулых у выніку забойстваў, а таксама колькасць выпадкаў наўмыснага прычынення цяжкіх цялесных пашкоджанняў. Пра гэта паведаміў міністр унутраных спраў Іван Кубракоў на селектарнай нарадзе, прысвечанай прафілактыцы цяжкіх і асабліва цяжкіх злачынстваў супраць жыцця і здароўя.

Паводле даных МУС, амаль 90% асоб, якія ўчынілі злачынствы гэтай катэгорыі, знаходзіліся ў стане ап’янення. Палова з іх не працавалі, чвэрць раней былі судзімыя, а кожны восьмы адпавядаў усім тром прыкметам.

“Практыка паказвае, што большасці такіх выпадкаў папярэднічаюць злоўжыванне алкаголем, незанятасць працоўнай дзейнасцю, сямейна-бытавыя канфлікты. Своечасова выявіўшы іх і належным чынам адрэагаваўшы на іх, можна было прадухіліць бяду”, – заявіў Кубракоў.

У якасці прыкладу ён прывёў трайное забойства, учыненае ў канцы кастрычніка ў Столінскім раёне. Злачынства адбылося падчас сумеснага распівання алкаголю. Падазраваны быў беспрацоўным і раней ужо ўчыняў забойства.

«З гэтага вынікае, што фокус павінен быць накіраваны на грамадзян, якія ўяўляюць павышаную грамадскую небяспеку! Важна не проста весці ўлік гэтай катэгорыі людзей, а валодаць рэальнай абстаноўкай, разумець характар існуючых рызык і выбудоўваць індывідуальную прафілактыку зыходзячы са складзеных абставінаў. Увесь неабходны для гэтага інструментарый у нас маецца, аднак задзейнічаны ён недастаткова эфектыўна», – заявіў Кубракоў.

Міністр запатрабаваў узмацніць прафілактычную працу, у тым ліку пакватэрныя абходы ўчастковых інспектараў.

“Мы павінны дайсці да кожнага, асабліва да тых, хто вядзе асацыяльны лад жыцця. Веданне рэальнай сітуацыі на месцах дапамагае спыняць правапарушэнні яшчэ да таго, як яны прывядуць да трагічных наступстваў”, – сказаў ён.

Кіраўнік МУС таксама падкрэсліў неабходнасць узаемадзеяння міліцыі з органамі сацыяльнай абароны, аховы здароўя, адукацыі і мясцовымі ўладамі для папярэджання бытавога гвалту і паўторных злачынстваў.

Паводле яго слоў, пры прыцягненні грамадзян да адказнасці неабходна ўлічваць абставіны кожнага канкрэтнага выпадку.