Борт EW-777PH ранее имел номер RA-73599. Фото сделано в Минске. Фото: Константин Масюк, russianplanes.net
У складзе ўрадавага авіяцыйнага парку Беларусі з’явіўся далёкамагістральны бізнес-джэт Bombardier Global Express XRS, раней зарэгістраваны ў Расіі. Самалёт атрымаў беларускі рэгістрацыйны нумар EW-777PH. Раней ён эксплуатаваўся пад расійскім нумарам RA-73599.
У базе Flightradar24 самалёт ужо пазначаны як паветранае судна ўрада Беларусі, а яго аператарам пазначаная авіякампанія «Белавія».
Афіцыйна пра набыццё самалёта беларускія ўлады і «Белавія» не паведамлялі. Невядомыя таксама кошт паветранага судна, крыніца фінансавання і юрыдычны ўласнік.
Самалёт Bombardier Global Express XRS быў выпушчаны ў 2009 годзе. Гэта далёкамагістральны адміністрацыйны самалёт, здольны перавозіць каля 12–15 пасажыраў і пераадольваць без пасадкі каля 11 тыс. кіламетраў.
Да рэгістрацыі ў Расіі борт выкарыстоўваў нумар T7-SNCR, прысвоены ў Сан-Марына, і эксплуатаваўся турэцкай кампаніяй Black Eagle. Раней ён таксама лётаў пад амерыканскімі нумарамі N211PB і N311PB. Гісторыя рэгістрацый паветранага судна прыводзіцца ў спецыялізаванай базе LAAS International.
У красавіку 2025 года самалёт быў увезены ў Расію і атрымаў нумар RA-73599. Як паведамляла ch-aviation, паветранае судна ўвайшло ў флот расійскай чартарнай кампаніі Tarp Aviation. Першы зафіксаваны рэйс пад яе кодам самалёт выканаў 7 мая 2025 года паміж Мінскам і маскоўскім аэрапортам Шарамеццева. Пасля ўвозу ў Расію ён пераважна выконваў палёты з Мінска.
Расійская авіяцыйная база RussianPlanes таксама пазначае, што RA-73599 меў заводскі нумар 9378. У маі 2025 года самалёт сфатаграфавалі ў Нацыянальным аэрапорце Мінск.
Пад новым беларускім нумарам EW-777PH борт ужо выконваў міжнародныя рэйсы. Паводле даных Flightradar24, 21 верасня ён пераляцеў з Маската ў аэрапорт Аль-Бацін у Абу-Дабі, а затым накіраваўся ў Мінск. Авіяцыйны назіральнік Johnny Gemini апублікаваў даныя пра вяртанне самалёта з ААЭ пад нумарам рэйса BRU8708.
Такім чынам, самалёт, які з вясны 2025 года фармальна лічыўся ў Расіі, але пераважна выкарыстоўваўся для рэйсаў з Мінска, цяпер перарэгістраваны ў Беларусі і ўключаны авіяцыйнымі базамі ва ўрадавы парк. Хто менавіта з беларускіх службовых асоб будзе карыстацца новым бізнес-джэтам, афіцыйна не паведамлялася.