У Абхазіі распачалі крымінальную справу аб замаху на згвалтаванне грамадзянкі Беларусі. Падазраваны Эдгар Абухба ужо знаходзіцца пад вартай па справе аб забойстве расіянкі.
Як паведаміла пракуратура самаабвешчанай Абхазіі, справа распачата 3 лістапада. Напад, паводле даных следства, адбыўся 18 верасня 2025 года ў Гагры.
Паводле версіі следства, на беразе мора насупраць гасцініцы «Еўропа» Абухба паспрабаваў згвалтаваць беларуску, пагражаў ёй забойствам і ўжыў фізічны гвалт, прычыніўшы цялесныя пашкоджанні. Жанчына стала клікаць на дапамогу і, скарыстаўшыся разгубленасцю нападніка, змагла ўцячы.
Справа распачата па частцы 3 артыкула 29 і пункце «б» часткі 2 артыкула 126 Крымінальнага кодэкса Абхазіі. Чаму яе распачалі больш чым праз год пасля апісаных падзей, у паведамленні не тлумачыцца.
У вытворчасці следчага ўпраўлення пракуратуры таксама знаходзіцца справа аб наўмысным забойстве грамадзянкі Расіі Аміны Бікбавай, у якім абвінавачваюць Абухбу. Паводле даных ведамства, забойства адбылося 23 верасня 2026 года ў сяле Псахара Гагрскага раёна.
Абухбу затрымалі 27 верасня, а 29 верасня Гагрскі раённы суд заключыў яго пад варту. Дзве крымінальныя справы плануюць аб’яднаць у адну вытворчасць.