Дональд Трамп. Фото: facebook.com/president.gov.ua
Прэзідэнт ЗША Дональд Трамп заявіў, што прасіў прэзідэнта Украіны Уладзіміра Зяленскага скараціць атакі на расійскія НПЗ, і той нібыта пагадзіўся.
«Вялікая праблема заключаецца ў тым, што нафтаперапрацоўчыя заводы ў Расіі ўзрываюцца. Гэта не столькі блізкаўсходняя праблема, колькі праблема Расіі — праз тое, што Украіна і Расія ваююць адна з адной, і Украіна падрывае дызельныя НПЗ у Расіі, таму што яны перапрацоўваюць шмат нафты. Таму гэтая сітуацыя сапраўды цікавая. І я размаўляў з прэзідэнтам Зяленскім», — сказаў Трамп.
У яго ўдакладнілі, што адказаў Зяленскі. Паводле слоў Трампа, украінскі прэзідэнт у цэлым пагадзіўся.
«Ну, мы, верагодна, так і зробім», — назваў Трамп адказ Зяленскага.
Ва Украіне нічога не абвяшчалі пра якія-небудзь рашэнні наконт гэтага. Разам з тым сёння раніцай украінскія маніторынгавыя каналы паведамілі пра меркаваны пажар на нафтабазе ў Краснадарскім краі РФ, які адбыўся падчас налёту беспілотнікаў.