Министра иностранных дел Беларуси Максим Рыженков с министром промышленности и торговли в правительстве Талибана Нуриддином Азизи 1 октября
Паездкі прадстаўнікоў урада Талібана ў Мінск, якія пачасціліся апошнім часам, звязаныя з закупкамі зброі. Пра гэта піша Afghanistan International са спасылкай на высокапастаўленыя крыніцы, уключаючы былых супрацоўнікаў службаў бяспекі.
Прадметам здзелак могуць выступаць зброя і беспілотнікі. Пры гэтым здзелкі могуць праводзіцца праз Індыю з прыцягненнем індыйскага фінансавання, паведамляе выданне.
Адзначаецца, што дэталі супрацоўніцтва пакуль невядомыя, таксама незразумела, якую палітычную і фінансавую дапамогу аказвае Індыя ў гэтым працэсе. Выданне піша, што Талібану, які сутыкаецца з ваеннай перавагай Пакістана, патрабуюцца беспілотнікі і іншыя ўзбраенні.
Паводле звестак Afghanistan International, адносіны паміж талібамі і Беларуссю пацяплелі пасля візіту міністра абароны групоўкі ў Маскву ў чэрвені і сустрэчы з высокапастаўленымі расійскімі чыноўнікамі. Падчас гэтай паездкі Расія і талібы абмеркавалі ваеннае супрацоўніцтва.
Папярэдні ўрад Афганістана на чале з прэзідэнтам Гані ўжо выкарыстоўваў індыйскую схему. Тады гаворка ішла пра закупку верталётаў Мі-35. Паводле звестак крыніцы выдання, прамое супрацоўніцтва з Беларуссю было немагчымае з-за пазіцыі ЗША. У выніку папярэдні ўрад прыйшоў да высновы пра немагчымасць падпісання прамога пагаднення і неабходнасць працы праз Індыю. Афіцыйныя дакументы таго часу паказваюць, што Індыя набыла ў Беларусі чатыры верталёты Мі-35 і перадала іх ВПС Афганістана.
Верагодна, талібы цяпер таксама могуць выкарыстоўваць падобную схему.
«Прынамсі двое былых высокапастаўленых вайскоўцаў і супрацоўнікаў службаў бяспекі заявілі, што Беларусь — гэта краіна, якая пры пасярэдніцтве Індыі і са згоды Расіі гатовая даць талібам некаторае абсталяванне, асабліва беспілотнікі», — гаворыцца ў публікацыі.
Высокапастаўленая крыніца, блізкая да талібаў у Кабуле, пацвердзіла выданню, што паміж двума бакамі былі дасягнутыя пагадненні і што гэтыя пагадненні «ў асноўным дасягнутыя па просьбе і пры каардынацыі Расіі».
Пазіцыя Індыі абумоўленая яе канфліктам з Пакістанам. Afghanistan International таксама звяртае ўвагу на больш частае выкарыстанне талібамі беспілотнікаў супраць Пакістана.
Afghanistan International звярнулася ў міністэрствы замежных спраў Індыі і Беларусі, а таксама да адміністрацыі талібаў па каментар наконт гэтага пытання, але ніводзін з бакоў не адказаў на пытанні.
Апошнім часам Мінск падчас выставы «Інапрам» наведалі міністры аховы здароўя, прамысловасці і гандлю, сельскай гаспадаркі Талібана. Раней у Кабул ездзілі прадстаўнікі МЗС і Мінпрама Беларусі.
У чэрвені 2026 года армія Індыі атрымала 106 дронаў-камікадзэ. Верагодна, гэта беларуская распрацоўка.