Швед паскардзіўся на нападкі на суддзяў з боку «дэструктыўных сіл»

Старшыня Вярхоўнага суда Беларусі Андрэй Швед заявіў, што суддзі падвяргаюцца нападкам з боку «дэструктыўных сіл». Аляксандр Лукашэнка паабяцаў імгненную рэакцыю, паведамляе яго прэс-служба.

На нарадзе Лукашэнкі з судзейскім корпусам Швед заявіў, што ўстойлівасць беларускага правасуддзя праверана падзеямі 2020 года. Ён адзначыў, што многія суддзі падвяргаліся і працягваюць падвяргацца нападкам з боку «дэструктыўных сіл».

«Расследавана больш за тысячу выпадкаў пагроз, абразы суддзяў, распаўсюджвання іх персанальных даных. Аднак калектыў не пахіснуўся і будзе выконваць свой службовы абавязак з неабходнай самааддачай», — заявіў Швед.

Лукашэнка папрасіў МУС і сваю адміністрацыю звярнуць увагу на спробы ціску на суддзяў і паабяцаў прыняць меры.

«Неаднойчы гучала тэма ціску на нашых суддзяў. Я папрашу праваахоўныя органы (кіраўнікі тут прысутнічаюць), Адміністрацыю Прэзідэнта звярнуць на гэта сур’ёзную ўвагу.

Называйце нам факты, каму хочаце – міністру ўнутраных спраў, старшыні Камітэта дзяржаўнай бяспекі, кіраўніку Адміністрацыі, генеральнаму пракурору. Або наўпрост выходзьце і дакладвайце мне па канкрэтным факце. Паверце: рашэнне будзе імгненным. Ніякага ціску на суд быць не павінна», — заявіў ён.