Фото: Генпрокуратура
Пракуратура Віцебскай вобласці накіравала ў суд крымінальную справу ў дачыненні да былога рэктара мясцовай ВНУ. Яму інкрымінуецца перавышэнне службовых паўнамоцтваў.
Мужчына кіраваў установай адукацыі ў галіне сельскай гаспадаркі і ўзначальваў прыёмную камісію. Паводле версіі абвінавачання, з ліпеня 2020 года па верасень 2023 года ён аддаваў падначаленым незаконныя ўказанні.
Мэтай было “ўяўнае выкананне кантрольных лічбаў прыёму і ўтойванне дакладных паказчыкаў па наборы абітурыентаў на дзённую форму навучання за кошт сродкаў бюджэту”. Работнікі падавалі ў прыёмную камісію дакументы абітурыентаў, іх залічвалі ў лік студэнтаў, а пазней адлічвалі.
“У выніку супрацьпраўных дзеянняў на дзённую форму атрымання вышэйшай адукацыі за кошт бюджэтных сродкаў, у тым ліку ў рамках мэтавай падрыхтоўкі, было фіктыўна залічана не менш за 95 грамадзян.
Дзеянні службовай асобы нанеслі істотную шкоду дзяржаўным інтарэсам – была скажоная дзяржаўная статыстыка, сарваны дзяржзаказ на падрыхтоўку кадраў для АПК, што пагоршыла дэфіцыт спецыялістаў, а таксама падарваны асабісты аўтарытэт кіраўніка і рэпутацыя ВНУ”, – заявілі ў пракуратуры.
Абвінавачанне былому рэктару прад’яўлена па ч. 3 арт. 426 Крымінальнага кодэкса. Дзеянням падначаленых асоб дадзена прававая ацэнка па ч. 1 арт. 427 Крымінальнага кодэкса.
Абвінавачаны застаецца да суда на волі пад асабістым паручыцельствам.