Фото: Volkan Olmez / Unsplash.com
Прырост ВУП Беларусі ў жніўні склаў усяго 0,7% у параўнанні з аналагічным перыядам мінулага года пасля 5,4% у ліпені. Запаволенне тэмпаў у першую чаргу звязана з тэрмінамі ўборачнай кампаніі. Калі ўклад аграрнай галіны ў прырост ВУП у ліпені складаў 2,3 п.п., то ў жніўні гэта ўжо было -0,6 п.п. Пра гэта гаворыцца ў экспрэс-аналізе працы беларускай эканомікі па выніках васьмі месяцаў, падрыхтаваным экспертамі MacroBy.
Нагадаем, на мінулым тыдні Белстат паведаміў, што прырост ВУП Беларусі па выніках студзеня-жніўня склаў 1,9% пасля 2,1% па выніках студзеня-ліпеня.
У MacroBy таксама адзначылі, што дынаміка росту валавога ўнутранага прадукту запаволілася і без уліку сельскай гаспадаркі. Калі ў ліпені ў гадавым вылічэнні прырост неаграрнага ВУП складаў 3,1%, то ў жніўні — толькі 1,3%.
“Паслабленне росту пераважна стала вынікам запаволення апрацоўчай прамысловасці і будаўніцтва. Калі валацільнасць будаўнічых работ тыповая для Беларусі, то зніжэнне абаротаў прамысловасці сігналізуе пра лімітавальны ўплыў інвестыцыйнага попыту ў Расіі і ўнутраных рэсурсных абмежаванняў. Унутраны попыт пры гэтым заставаўся высокім, падштурхоўваемы значнымі бюджэтнымі і квазібюджэтнымі ўліваннямі і зніжэннем працэнтных ставак”, — гаворыцца ў экспрэс-аналізе.
Эксперты MacroBy чакаюць, што ў астатнія месяцы года ўрад будзе працягваць падтрымліваць унутраны попыт.
“Спісанне ў II квартале 2026 года каля 1,86 млрд долараў дзярждоўгу дазволіць уладам больш актыўна накіроўваць рэсурсы бюджэту ў эканоміку, а працэнтныя стаўкі па крэдытах і ўкладах, якія знізіліся, будуць падтрымліваць спажывецкую актыўнасць.
Стымуляванне ўнутранага попыту пры адсутнасці моцных знешніх шокаў дазволіць ВУП Беларусі вырасці на 2–2,5% у 2026 годзе, але будзе суправаджацца павелічэннем грашовага навесу — шырокая грашовая маса мае высокія шанцы прыбавіць больш за 20% па выніках года. Гэта будзе перашкаджаць устойліваму запаволенню інфляцыі, якая чакаецца ў дыяпазоне 5–6% у 2026 годзе і 6–7% у 2027 годзе”, — адзначылі эксперты.