Фото: #RFRM
Прыбытак беларускіх банкаў у студзені-верасні склаў амаль 3 млрд рублёў. Пра гэта заявіў старшыня праўлення Нацбанка Раман Галоўчанка на пасяджэнні, прысвечаным вынікам працы рэгулятара і банкаўскай сістэмы за дзевяць месяцаў.
“Золатавалютныя рэзервы захоўваюцца паблізу іх гістарычнага максімуму, пры гэтым усе знешнія абавязацельствы краіны выконваюцца ў поўным аб’ёме. Дзяржаўны доўг, знешні доўг устойліва зніжаецца. Адпаведна, у рамках бяспечных значэнняў знаходзяцца асноўныя паказчыкі функцыянавання і банкаўскай, і плацежнай сістэмы.
Паказчык дастатковасці нарматыўнага капіталу знаходзіцца ў прымальных параметрах 19%. Нагадаем, што парогавая велічыня 12,5%. Што тычыцца фінансавай дзейнасці непасрэдна банкаў, то ўсе банкі паводле вынікаў трэцяга квартала і ў цэлым за дзевяць месяцаў спрацавалі прыбыткова. За студзень-верасень агульны прыбытак склаў амаль 3 млрд рублёў”, – сказаў ён.
Галоўчанка таксама адзначыў, што расце рублёвы складнік у шырокай грашовай масе. Ён павялічыўся на 3 п.п. да 68,2%. Таксама растуць аб’ёмы чыстага продажу замежнай валюты. У студзені-верасні ён склаў 1,6 млрд долараў.
Кіраўнік Нацбанка таксама падкрэсліў, што банкаўскія крэдыты з’яўляюцца цяпер асноўнай крыніцай інвестыцый прадпрыемстваў.
“Не ўласныя сродкі, не бюджэтны імпульс, а банкаўскі крэдыт адыгрывае ўсё большую ролю ў фінансаванні інвестыцый. Ну і, адпаведна, рэсурсная база, якая сфарміравана такім чынам, яна спрыяла і росту падтрымкі банкамі эканомікі.
Патрабаванні банкаў да эканомікі ўзраслі на 13% пры заданні 9%. Мэтавая ўстаноўка па прыярытэтным крэдытаванні эфектыўных інвестыцыйных праектаў суб’ектаў гаспадарання, якія выпускаюць экспартаарыентаваную прадукцыю, імпартазамяшчальную прадукцыю, выконваецца. Інвестыцыйнае фінансаванне павялічылася больш чым на траціну, склала ў цэлым 6,2 млрд рублёў”, – сказаў ён.
Доля крэдытаў на набыццё беларускіх тавараў у структуры спажывецкага крэдытавання вырасла да 20%.
“Такія дастаткова пазітыўныя вынікі ў грашова-крэдытнай сферы, яны адыгралі і важную ролю ў агульнай сітуацыі ў эканоміцы, падтрымалі рост валавога ўнутранага прадукту. Але што, напэўна, яшчэ больш важна, умацавала і знешнюю ўстойлівасць эканомікі нашай краіны”, – канстатаваў Галоўчанка.