Александр Ходжаев. Фото: ОНТ
Прапанову аб узмацненні патрабаванняў да работнікаў прыватных медцэнтраў адправілі на дапрацоўку. Пра гэта заявіў пасля нарады ў Аляксандра Лукашэнкі міністр аховы здароўя Аляксандр Хаджаеў.
У законе аб ліцэнзаванні прапаноўвалася павялічыць неабходны для атрымання ліцэнзіі стаж працы медработнікаў прыватнага цэнтра з 3 да 7 гадоў, а таксама распаўсюдзіць патрабаванне аб наяўнасці першай катэгорыі на сярэдні медперсанал.
“З майго пункту гледжання, тры гады – гэта дастаткова невялікі тэрмін, каб мець магчымасць набрацца неабходнага клінічнага досведу, навучыцца прымаць правільныя рашэнні ў экстраннай сітуацыі. Дастаткова значны аб’ём ведаў патрабуецца атрымаць за пэўны прамежак часу. Яго трэба не толькі атрымаць, але і прымяніць на практыцы”, – растлумачыў ідэю Хаджаеў.
Паводле яго слоў, у выніку даручана прапрацаваць гэтыя прапановы, у тым ліку вынесці іх на грамадскае абмеркаванне.
“Кіраўнік дзяржавы паставіў вельмі правільную задачу, якая заключаецца ў тым, што мы не павінны вырашаць павярхоўна. Мы павінны вырашыць сістэмна. Патрабуецца дадатковае абмеркаванне з грамадскасцю, аналітычныя даныя, якія дазволяць зрабіць канкрэтны выбар: гэта прапанова вырашае праблему, якую мы перад сабой ставім, ці мы павінны прапанаваць такое рашэнне, якое гэтую праблему вырашыць карэнным чынам”, – сказаў Хаджаеў.
“Пастараемся за самыя кароткія тэрміны вызначыць напрамкі, трэнды, якія прапануем да абмеркавання і зацвярджэння. Да 1 студзеня вызначаныя тэрміны для выпраўлення той сітуацыі, якая на сённяшні дзень выклікае асцярогі, або абгрунтавання таго, як павінна быць”, – дадаў ён, перадае БелТА.