Главный редактор 6tv.by Дмитрий Соловьев. Фото: @yhlushkou
Акруговы суд у Беластоку 22 кастрычніка пастанавіў, што выдача Беларусі былога галоўнага рэдактара навінавага партала «Магілёўскі рэгіён» Дзмітрыя Салаўёва юрыдычна недапушчальная. Пра гэта паведамляе Беларуская асацыяцыя журналістаў.
У жніўні Генеральная пракуратура Беларусі запатрабавала ад Польшчы экстрадыраваць журналіста, які з 2021 года жыве ў вымушанай эміграцыі.
Паводле слоў Салаўёва, польскі бок першапачаткова не меў намеру адпраўляць яго ў Беларусь, аднак пасля запыту беларускіх уладаў павінен быў прайсці прадугледжаную законам працэдуру.
Падчас судовага разбору журналіст расказаў пра крымінальныя справы, распачатыя супраць яго ў Беларусі ў сувязі з прафесійнай дзейнасцю. Яго абвінавачваюць у стварэнні “экстрэмісцкага фарміравання” і ўдзеле ў ім, а таксама ва ўдзеле ў “змове” з мэтай захопу дзяржаўнай улады неканстытуцыйным шляхам.
Суд пастанавіў, што экстрадыцыя недапушчальная, паколькі ў Беларусі могуць быць парушаныя правы і свабоды журналіста.
«Мяне падрабязна распыталі, якія абставіны прымусілі пакінуць радзіму і што мне пагражае ў Беларусі», – расказаў Салаўёў пасля атрымання афіцыйнай судовай пастановы.
Цяпер дакумент накіруюць міністру юстыцыі Польшчы, які прыме канчатковае рашэнне.
Дзмітрый Салаўёў пакінуў Беларусь у 2021 годзе, пасля таго як атрымаў інфармацыю пра распачынанне супраць яго першай крымінальнай справы. Пра другую справу ён даведаўся пазней з запыту Генпракуратуры аб экстрадыцыі. Да таго часу журналіст ужо некалькі гадоў знаходзіўся ў вышуку на тэрыторыі Беларусі і Расіі.
Салаўёў быў галоўным рэдактарам партала «Магілёўскі рэгіён». У рашэнні КДБ Беларусі ад 29 лістапада 2023 года “экстрэмісцкім фарміраваннем” была прызнаная група грамадзян, аб’яднаных ініцыятывай «6TV Bielarus», а таксама яе структурнае падраздзяленне «Магілёў Медыя» («Навіны Магілёўскага рэгіёну»).
Журналіст не выключае, што патрабаванне аб яго экстрадыцыі можа папярэднічаць пачатку “спецыяльнай вытворчасці” ў дачыненні да яго ў Беларусі.