Фото: МВДиА Польши
Польшча ўмацавала пункты пропуску на мяжы з Украінай. Гэта было зроблена пасля таго, як 13 верасня Расія нанесла ўдары па аб’ектах у памежжы, у тым ліку па АЗС і лакаматыве каля памежнага пераходу Ягадзін — Дарагуск.
“Учора ўвечары завяршылася ўмацаванне пастоў Памежнай аховы на пункце пропуску ў Дарагуску”, — паведаміў міністр унутраных спраў і адміністрацыі Марцін Кервіньскі.
Ён апублікаваў фатаграфію ахоўных блокаў, усталяваных на пасту памежнікаў.
РФ у апошнія тыдні стала часцей атакаваць украінскія пункты пропуску на межах з краінамі ЕС. Пападанні былі зафіксаваныя ў пунктах пропуску на мяжы з Малдовай і Румыніяй, якія былі вымушаныя прыпыняць сваю працу. Паведамлялася пра пацярпелых і матэрыяльную шкоду.