Фото: Reform.news
Польшча па выніках 2025 года абнавіла рэкорд міграцыйнага прыросту насельніцтва, гаворка ідзе пра пастаяннае месца жыхарства. На гэта ўказваюць даныя Галоўнага статыстычнага ўпраўлення, апублікаваныя на гэтым тыдні. Асноўны ўклад у міграцыйны прырост уносяць беларусы і ўкраінцы.
У 2025 годзе з Польшчы на пастаяннае месца жыхарства выехаў 10 181 чалавек, а прыехалі ў краіну 21 087. Міграцыйны прырост склаў 10 906 чалавек.
Асноўны ўклад унёс міграцыйны абмен з Беларуссю і Украінай. Так, калі ў Беларусь з Польшчы з’ехалі 5 чалавек, то з Беларусі на пастаяннае месца жыхарства прыехалі 2849 чалавек. Ва Украіну з’ехалі 39 чалавек, а прыехалі з краіны 6397 чалавек.
Прыкметны адток назіраецца толькі ў напрамку Германіі. У мінулым годзе з Польшчы туды з’ехалі 3129 чалавек, а прыбылі 2656.
Міграцыйны абмен з Вялікабрытаніяй, якая калісьці была адным з галоўных напрамкаў ад’езду палякаў, цяпер складваецца на карысць Польшчы. У мінулым годзе ў Злучанае Каралеўства адправіліся 2247 чалавек, а прыехалі адтуль 2496.
Трэба адзначыць, што міграцыйны прырост у Польшчы фіксуецца з 2016 года.