МЗС Беларусі занепакоены «адвольнымі арыштамі» ў Францыі

Міністэрства замежных спраў Беларусі выступіла з заявай у сувязі з пратэстамі школьнікаў у Францыі.

Асаблівую занепакоенасць МЗС выклікалі затрыманні непаўналетніх пратэстоўцаў. Беларусь лічыць, што арышты толькі ўзмоцняць радыкалізацыю пратэстаў.

«Міністэрства замежных спраў Рэспублікі Беларусь з глыбокай занепакоенасцю сочыць за падзеямі ў Францыі. Даныя, якія паступаюць, уключаючы колькасць затрыманых удзельнікаў пратэстаў, што набліжаецца да 3 тысяч чалавек, сярод якіх значную частку складаюць непаўналетнія, сведчаць пра крайнюю ступень напружанасці ў грамадстве.

Відавочна, што акцыі выкліканыя сістэмнымі праблемамі ў адукацыі. Аднак замест дыялогу з грамадствам французскія ўлады звяртаюцца да масавых адвольных арыштаў, што толькі ўзмацняе радыкалізацыю пратэстаў», — гаворыцца ў заяве.

МЗС выказаў шкадаванне, што ўлады Францыі накіроўваюць сродкі на фінансаванне «сумнеўных праваабарончых структур, адкрыта радыкальных утварэнняў» і падтрымку канфліктаў за мяжой замест таго, каб укладваць у сацыяльную сферу і адукацыю.

Беларускі бок таксама абураны тым, што «заходнія праваабарончыя структуры і палітыкі сёння захоўваюць маўчанне».

МЗС Беларусі заклікаў улады Францыі:

• неадкладна вызваліць усіх непаўналетніх, затрыманых падчас пратэстаў;
• правесці бесстаронняе расследаванне фактаў празмернага прымянення сілы, асабліва ў дачыненні да падлеткаў;
• перайсці да цывілізаванага дыялогу з навучэнцамі, іх бацькамі і прафсаюзамі для вырашэння праблем у сістэме адукацыі.

Беларусь таксама выказала салідарнасць з пацярпелымі.

Нагадаем, у Францыі некалькі дзён працягваюцца пратэсты старшакласнікаў. Яны пачаліся ў Парыжы і распаўсюдзіліся на ўсю краіну. Школьнікі пратэстуюць супраць перапоўненых класаў, вялікай загружанасці навучэнцаў, недахопу настаўнікаў. Акцыі пратэсту пераходзяць у сутычкі з паліцыяй.