Источник фото: threads.com/@veronika__ph
Мінчанка Таццяна Маслава, якая трэці месяц падпрацоўвае на складзе Wildberries у «Вялікім камені», паказала ў сваім Threads скрыншоты рабочай праграмы са штрафамі і расказала, як уладкаваная праца, дзеля якой беларусы начамі стаяць у чэргах. Паводле яе слоў, каб зарабіць хаця б 300 рублёў, зборшчыку трэба знайсці на стэлажах і сабраць для заказаў 1500 рэчаў, не страціўшы ніводнай. Калі тавар згубіўся, наймальнік, не разбіраючыся, спісвае яго поўны кошт. Так, за адзін згублены тавар 4 лістапада з Таццяны спісалі 3707,85 бел. рублёў.
Пры гэтым, паводле яе слоў, згубіць тавар мог зусім не той, каго аштрафавалі, а любы з работнікаў на наступных участках. Цяпер, калі на складзе шмат навічкоў, гэта зусім не рэдкасць.
Вось як гэта ўладкавана.
Першы ўчастак – прыёмка: рэчы прымаюць і пералічваюць. Другі – раскладка: рэчы нясуць на мезанін (шматпавярховыя стэлажы) і кладуць у ячэйку, адсканаваўшы і рэч, і ячэйку. Калі рэч заказваюць, трэці работнік атрымлівае на тэрмінале адрас ячэйкі, ідзе туды і забірае яе — гэта зборка. Далей заказ едзе на сартаванне.
Штраф з’яўляецца, калі рэчы няма там, дзе яна лічыцца ў сістэме. Яе кошт спісваюць з аднаго з работнікаў, праз чые рукі яна праходзіла. Паводле слоў Таццяны, трапіць пад такое спісанне можна на любым участку. Невядома, паводле якога правіла сістэма выбірае, з каго спісаць суму.
«Атрымліваеш мінус і прапанову самому шукаць прапажу на мезаніне з 5 паверхаў і 42 радоў», – піша яна.
Да поста Таццяна прыклала некалькі скрыншотаў з асабістых кабінетаў. На адным з іх – спісанні за першую палову лістапада ў беларускіх рублях. 4 лістапада з яе знялі 3707,85 рубля, 5 лістапада — 130,11, 10 лістапада — 72,79 – усе тры радкі пазначаныя як вылік кошту тавару. Яшчэ 17,82 рубля спісалі днямі за рэч, не знойдзеную пры зборцы. У суме гэта 3928,57 рубля.
На іншым скрыншоце відаць, што частку грошай вяртаюць, але сумы там меншыя, і ўжо ў расійскіх рублях, патлумачыла аўтар поста ў каментарыях. Бонус у 5000 – у іх жа (гэта каля 182 бел. рубля).
Дзяўчына лічыць несправядлівым, што за згублены тавар адказвае адзін работнік, хоць праз тую ж ячэйку праходзяць дзясяткі людзей. Рэч маглі перакласці, упусціць або пакласці не туды. З-за наплыву навічкоў, піша яна, тавар «раскідваюць абы-як», ячэйкі перапоўненыя, рэчы валяюцца ў радах.
Да таго ж спісваюць не фіксаваную суму, а кошт тавару, і ён несупастаўны з заробкам. За зборку 300 рэчаў плацяць каля 60 рублёў, то-бок прыкладна 20 капеек за штуку, так што адна прапажа можа перакрэсліць змену. А тыя самыя 3707,85 рубля — гэта 12–15 дванаццацігадзінных змен на раскладцы паводле расцэнак, якія называе сама Таццяна.
Пры гэтым даказаць сваю рацыю практычна немагчыма: дапамагчы можа толькі інвентарызацыя, і тое без гарантыі. Раздзел «Аспрэчванні» ў праграме пры гэтым ёсць, а на іншым скрыншоце відаць, што частку спісанняў вярнулі.
У каментарыях новая работніца склада расказала, што рэкрутэр па тэлефоне запэўнівала яе, нібыта штрафаў няма. Ужо на складзе высветлілася, што іх увялі месяц таму.
Расказ Таццяны гэта пацвярджае: першы месяц «усё было супер» — 250–300 рублёў за 12-гадзінную змену на раскладцы, — а цяпер праца ёй «прыносіць адны мінусы». Сыходзіць яна пакуль не збіраецца, «калі не зусім у мінусы пайду», паколькі на складзе «адпачывае галавой» – па асноўнай прафесіі Таццяна – бухгалтар. Але тым, хто гатовы трое сутак стаяць у чарзе на афармленне, раіць прыгледзецца, ці варта яно таго.
Нагадаем, праца на складзе Wildberries у «Вялікім камені» выклікае ажыятажны інтарэс у мінчукоў: людзі займаюць чаргу ноччу і ездзяць туды па некалькі дзён запар. Людзі спрабуюць трапіць унутр па два-тры дні, а тыя, хто запісваецца апоўначы, атрымліваюць нумары ў раёне 80-га. Аплата здзельная: ад 1500 да 6000 рублёў, у залежнасці ад выпрацоўкі.