Скриншот видеозаписи
Міністр эканомікі Беларусі Юрый Чабатар пракаментаваў зацверджаныя найважнейшыя паказчыкі і параметры сацыяльна-эканамічнага развіцця на 2027 год. Паводле яго слоў, экспарт будзе расці за кошт выхаду на новыя рынкі краін далёкай дугі, паведамляе БелТА.
У Беларусі ў 2027 годзе ВУП плануецца павялічыць на 1,9% у параўнанні з 2026 годам, экспарт — на 2,9%, інвестыцыі — на 3,1%, а рэальныя наяўныя даходы насельніцтва — на 3%.
«За кошт чаго мы будзем развівацца і дасягаць пастаўленых мэт? У першую чаргу гэта экспартная праграма. У 2027 годзе прадугледжаны рост экспарту на 2,9%. Самае галоўнае, што мы працягваем траекторыю руху па асваенні новых рынкаў далёкай дугі. Усе нашы экспарцёры будуць працягваць атрымліваць падтрымку ў межах дзеючых асноўных механізмаў — указаў №466 і №534. Таксама запрацаваў эксперымент па падтрымцы лагістыкі ў краіны далёкай дугі. Усё гэта будзе ствараць пэўны каркас для выканання задач у плане экспарту», — заявіў Чабатар.
Міністр эканомікі таксама згадаў Кітай як другога гандлёвага партнёра Беларусі.
«Мы чакаем адпаведных вынікаў як па экспарце, так і па імпарце, а таксама ў сферы тэхналагічнага развіцця», — заявіў міністр.
Рост інвестыцый на 3,1% плануецца забяспечыць за кошт мадэрнізацыі і стварэння новых вытворчасцей.
«Мы ўжо не першы год робім стаўку на гэты кірунак. Перш за ўсё гэта мадэрнізацыя рэальнага сектара эканомікі, з’яўленне новых вытворчасцей. Мы сёння арыентуем усе нашы прадпрыемствы на паскораныя тэмпы абнаўлення машын і абсталявання. Прыняты ўказ Прэзідэнта «Аб стымуляванні рабатызацыі». Мы таксама працягнем нашу ініцыятыву ў плане падтрымкі праектаў з рэгіёнаў. Немалаважнымі з’яўляюцца рост прадукцыйнасці працы, нашых кампетэнцый, тэхналагічнай самадастатковасці, а таксама рэалізацыя сумесных праектаў з іншымі краінамі», — расказаў Чабатар.
Тэмпы будаўніцтва арэнднага жылля плануецца павялічыць у 1,5 раза.
«Будзе працягнута будаўніцтва асноўнай сацыяльнай інфраструктуры, рэалізацыя Дзяржінвестпраграмы, рэгіянальных праграм. Усё гэта будзе фарміраваць спрыяльныя ўмовы для росту дабрабыту насельніцтва», — адзначыў міністр.
Рост рэальных наяўных грашовых даходаў прадугледжаны на ўзроўні 3%, але, паводле слоў чыноўніка, гэта не мяжа.
«Мы ўпэўненыя, што заробак будзе расці больш высокімі тэмпамі, у тым ліку дзякуючы мадэрнізацыі нашых прадпрыемстваў. Спрыяць росту рэальных даходаў будуць і ўмераныя тэмпы росту інфляцыі — не больш за 6%. Перадумовы для гэтага ёсць, у тым ліку добры ўраджай у бягучым годзе», — падкрэсліў Чабатар.
Запланаваны рост ВУП — 1,9% да ўзроўню 2026 года.
«Прырост плануецца каля 7 млрд долараў з дасягненнем недзе 114–114,5 млрд долараў. Будзе забяспечаны рост ВУП на душу насельніцтва, у тым ліку па парытэце пакупніцкай здольнасці», — заявіў Чабатар.