Міністэрства антыманапольнага рэгулявання выявіла, што Гродзенская ўніверсітэцкая клініка пры разліку тарыфу на нерэгулюемую медыцынскую паслугу прымяняла ўзровень рэнтабельнасці ў 960%. Паводле інфармацыі ведамства, гаворка ідзе пра інтравітрэальнае ўвядзенне лекавых прэпаратаў у выхадныя і святочныя дні. Платную паслугу ў клініцы ўвялі для павышэння даступнасці медыцынскай дапамогі.
Пацыенту, якому патрабуецца такая працэдура, акрамя дарагога прэпарата коштам ад 400 да 500 рублёў неабходна заплаціць яшчэ 280 рублёў за яго ўвядзенне. У МАРГ адзначылі, што захворванне «Узроставая макуладыстрафія, дыябетычная рэтынапатыя, трамбоз цэнтральнай вены сятчаткі» часцей выяўляецца ў людзей ва ўзросце 50–70 гадоў.
Для фарміравання абгрунтаваных тарыфаў ведамства накіравала інфармацыю ў Міністэрства аховы здароўя. Міністэрству прапанавана прааналізаваць кошт аналагічнай паслугі ў іншых установах аховы здароўя і прыняць неабходныя меры.
Акрамя таго, МАРГ праверыў цэны на 123 лекавыя прэпараты на сайце tabletka.by. Прыкладна па 100 пазіцыях цэны ў параўнанні з папярэднім месяцам не змяніліся, а па некаторых прэпаратах знізіліся на 0,1–6,7%. Вынікі маніторынгу таксама накіраваныя ў Міністэрства аховы здароўя.