Аляксандр Лукашэнка збіраецца наведаць прадпрыемствы, дзе рэалізуюцца праекты за расійскія крэдытныя сродкі. Пра гэта расказаў беларускаму тэлебачанню кіраўнік адміністрацыі Лукашэнкі Дзмітрый Круты.
“Нашы прамысловыя флагманы рэалізуюць шэраг праектаў, звязаных у тым ліку з выкарыстаннем інтэграцыйных грошай па крэдытных рэсурсах, якія выдзяляюцца Расійскай Федэрацыяй. Гэта вытворчасць прадуктаў для нашага саюзнага рынку. Запрашаюць прэзідэнта наведаць шэраг вытворчасцей, звязаных з гэтай лінейкай”, – сказаў ён.
Трэба адзначыць, што апошнім часам Лукашэнка прымаў у сябе ў палацы расійскіх чыноўнікаў, у кампетэнцыю якіх уваходзіць у тым ліку рэалізацыя гэтых праектаў. У прыватнасці, у Мінск прыязджаў расійскі віцэ-прэм’ер Дзяніс Мантураў, які курыруе працу прамысловасці. Падчас візіту ён быў узнагароджаны ордэнам Дружбы народаў. Сёння ў Лукашэнкі быў кіраўнік расійскага “Банка ПСБ” Пётр Фрадкоў. Гэты банк удзельнічае ў фінансаванні інтэграцыйных праектаў.
Таксама плануецца мерапрыемства з удзелам Акадэміі навук.
“Яшчэ, напэўна, адзін блок, пра які трэба сказаць, і таксама ў найбліжэйшы час такое мерапрыемства адбудзецца – гэта даручэнні нашым навукоўцам Акадэміі навук. Яны таксама пакажуць свае пэўныя распрацоўкі і тыя задачы, якія ў мінулым годзе ставіліся перад імі, я думаю, яны нашаму лідару таксама даложаць”, – сказаў Круты.