Фото: пресс-служба Лукашенко
Нежынскі ГАК не ўдалося здаць у раней вызначаны тэрмін. Ёсць праблемы з ліквідацыяй дэфектаў, а паказчыкі вытворчых магутнасцяў не выкананы. Пра гэта заявіў Аляксандр Лукашэнка на сённяшняй нарадзе, прысвечанай будаўніцтву прадпрыемства.
ААТ “Нетры Нежын” вырабляе прадукцыю з верасня 2025 года. За гэты час выпушчана 400 тыс. т калійных угнаенняў, якія ў тым ліку пайшлі на экспарт. Аднак летась пры наведванні камбіната Лукашэнка заяўляў, што магутнасць ГАК да канца 2025-га дасягне 1,1 млн т у год.
Аляксандр Лукашэнка сёння адзначыў, што не забяспечаны ва ўстаноўлены тэрмін, да 3 ліпеня, увод першай і другой чэргаў будаўніцтва. Урад абавязаўся ўвесці іх да 1 лістапада.
“Калі чакаем выхад на 1,1-1,2 млн тон мінеральных угнаенняў?” – спытаў сёння Лукашэнка.
Паводле яго слоў, таксама ёсць пытанні да якасці працы падрадчыкаў.
“Мяне інфармуюць, ёсць пытанні па якасці выкананых падрадчыкамі будаўніча-мантажных работ, тэрмінах ліквідацыі дэфектаў і заўваг”, – працягнуў ён.
Плануецца, што да канца наступнага года павінны скончыць трэцюю і чацвёртую чэргі будаўніцтва, а вытворчыя магутнасці павінны вырасці да 2 млн т калійных угнаенняў у год.
“Нам неабходна забяспечыць дасягненне праектных рашэнняў, якія ў канчатковым выніку ўплываюць на эканоміку прадпрыемства (і не толькі прадпрыемства). Будуем у асноўным за крэдытныя грошы, а іх трэба вяртаць. Акрамя таго, запуск новай вытворчасці калійных угнаенняў пры поўнай загрузцы стане стабільнай крыніцай паступлення падатковых плацяжоў, валютнай выручкі, дасць развіццё Любанскаму раёну Мінскай вобласці – гэта абавязкова, раён павінен атрымаць сваё развіццё”, – сказаў Лукашэнка.
Ён прапанаваў абмеркаваць перспектывы рэалізацыі праекта і выхаду на чаканыя значэнні, план дзеянняў для яго завяршэння ў тэрмін і магчымыя прапановы па далейшым развіцці комплексу. Лукашэнка таксама пацікавіўся развіццём сацыяльнай і іншай інфраструктуры Любанскага раёна.
Першы віцэ-прэм’ер Мікалай Снапкоў далажыў, што аб’екты першай і другой чэргаў Нежынскага ГАК уведзены ў эксплуатацыю, а яго магчымасці адпавядаюць вытворчасці 1 млн тон угнаенняў у год.
“Сёлета 500 тыс. тон. У наступным – жалезна 1 млн тон. Усе акты прыёмкі падпісаны. Першая і другая чэргі ўведзены ў эксплуатацыю. Па ўсіх пускавых комплексах атрыманы заключэнні наглядных органаў”, – сказаў Снапкоў.
Ён дадаў, што яшчэ трэба выканаць асобныя віды работ, напрыклад, цеплавую ізаляцыю часткі тэхналагічных трубаправодаў і абсталявання, антыкаразійную абарону металаканструкцый і абсталявання, аздобныя работы, аднак усё гэта не перашкаджае эксплуатацыі камбіната.
Нагадаем, у снежні мінулага года Лукашэнка заяўляў, што вылучаў амерыканскаму боку прапанову набыць прадпрыемства за 3 млрд долараў. Нежынскі ГАК першапачаткова будавала кампанія «Слаўкалій» расійскага алігарха Міхаіла Гуцэрыева. Аднак пасля таго, як у дачыненні да яго і яго структур былі ўведзены санкцыі, праект прыпыніўся. У выніку на пляцоўцы Нежынскага ГАК у 2022 годзе з’явілася ААТ «Нетры Нежын». У 2025 годзе Лукашэнка прызнаў, што прадпрыемства было нацыяналізавана.