Аляксандр Лукашэнка сёння сустрэўся з губернатарам Мурманскай вобласці Расіі Андрэем Чыбісам. Гаворка ішла пра сумесныя прадпрыемствы, пазбаўленне ад крытычнай залежнасці і памяць ВАВ, аднак прэс-служба Лукашэнкі пакуль не згадвала тэму беларускага порта ў рэгіёне.
“Мы з Мурманскай вобласцю гатовы працаваць так, як гатова да гэтага Мурманская вобласць. Мы вас не лічым далёкім арктычным рэгіёнам, хаця ён арктычны, але не далёкі для нас. Мы гатовы з вамі будаваць адносіны не толькі на падставе паставак нашай прадукцыі ў ваш край, хаця гэта таксама важна, але і гатовы ствараць сумесныя прадпрыемствы, каб атрымліваць выгаду ўсім нам”, – сказаў Лукашэнка.
У якасці прыкладаў супрацоўніцтва з рэгіёнам ён назваў пасажырскую і спецыяльную тэхніку, харчаванне, сельскую гаспадарку, ліфты.
“Мы гатовы па ўсіх гэтых напрамках з вамі супрацоўнічаць. Тым больш вельмі інтэнсіўна працуем над тым, каб адысці ад усяго імпартнага заходняга – з тых краін, якія ўвялі супраць нас санкцыі. Мы паспяхова гэта практычна зрабілі. Тычыцца перш за ўсё прамысловасці па некаторых камплектуючых, вузлах. У гэтай частцы вы можаце разлічваць на Беларусь”, – сказаў Лукашэнка.
Ён таксама вырашыў падкрэсліць перавагі беларускай прадукцыі перад імпартнай.
“Імпартнае можа быць дзе-нідзе ўзроўнем вышэй, але гэта чужое. Калі раптам нешта, гэта трэба за трыдзевяць зямель шукаць, і не ўсё так проста. А тут, у сябе… Беларусь для Расіі не чужая. Гэта сваё. У любы момант мы можам паставіць любую дэталь, якая выйшла са строю ў нашай тэхніцы, можам паставіць патрэбную колькасць харчавання, прадуктаў харчавання, адзення, калі гэта трэба будзе для вас. Хаця вы паспяхова, я ведаю, вырашаеце любыя праблемы. Вы ведаеце, чым багатая Беларусь, чым яна можа дапамагчы рэгіёнам Расіі. Перш за ўсё такім блізкім нам рэгіёнам, як Ленінградская вобласць, Піцер, і, натуральна, Мурманск”, – працягнуў Лукашэнка.
Паводле яго слоў, ён пастаянна агітуе расійскі бок за тое, каб пазбавіцца ад залежнасці ад трэціх краін.
“Давайце рухацца наперад, але самае галоўнае – бачыць свой інтарэс. Вы бачыце, як развіваюцца падзеі ў свеце. Трэба абараняць сваю зямлю, сваіх людзей і бачыць перш за ўсё свой інтарэс. На любой сустрэчы з кіраўніцтвам Расіі я выказваю гэтую пазіцыю, арыентую іх на тое, што нам трэба пазбавіцца ад нейкай залежнасці ад іншых краін, асабліва крытычнай залежнасці. Сваё трэба абараняць”, – сказаў ён.
Лукашэнка, у прыватнасці, згадаў “тавар Саюзнай дзяржавы” і дадаў, што ў гэтым напрамку трэба рухацца і не ствараць дадатковых бар’ераў.
“Мы абавязкова дасягнём сваіх мэт, паколькі гэта інтарэсы нашых народаў – расіян і беларусаў”, – адзначыў ён.
“Па любых напрамках мы гатовы падключыцца і працаваць. Я ўпэўнены, што мы з вамі дасягнём пэўных вынікаў, калі будзем арыентаваныя на інтэнсіўнае супрацоўніцтва паміж вашым рэгіёнам і Беларуссю”, – заключыў Лукашэнка.
Адзначаецца, што ў мінулым годзе пастаўкі ў Мурманскую вобласць беларускіх тавараў склалі 103,9 млн долараў, павялічыўшыся на 5%.
Нагадаем, у красавіку 2024 года было падпісана пагадненне аб будаўніцтве беларускага тэрмінала ў Мурманску. Магутнасць порта павінна скласці 25-30 млн т грузаў у год. Чакаецца, што першыя пастаўкі праз яго пойдуць у 2028 годзе. У красавіку 2024 года таксама была створана юрыдычная асоба, якая павінна займацца развіццём праекта. З таго часу навін пра беларускі порт у Мурманску было няшмат. У лістападзе мінулага года намесніца губернатара — міністр развіцця Арктыкі і эканомікі Мурманскай вобласці Святлана Панфілава казала, што праект знаходзіцца “на перадінвестыцыйнай стадыі выпрацоўкі праектных рашэнняў і таго, як забяспечыць гэты тэрмінал інфраструктурай».
Не абышлося і без гістарычных адступленняў. На гэты раз Лукашэнка ўспомніў перыяд Вялікай Айчыннай вайны. Паводле яго слоў, на тэрыторыі вобласці ваяваў пісьменнік Іван Шамякін. Падобныя факты звязваюць Беларусь і Мурманскую вобласць. Лукашэнка таксама падкрэсліў важную ролю Мурманска, праз які ішлі пастаўкі ваеннай тэхнікі.
“У тым ліку і дзякуючы гэтаму Мурманск пакрыў сябе неўвядаемай славай. Загінула там нямала людзей. Але годна змагаліся паўночнікі, каб прывесці нас да той Перамогі, якую святкавалі ў маі 1945-га.
Так сама, як Беларусь, вы ад гэтай вайны настрадаліся, пацярпелі. І гэта наша агульная Перамога. Мы яе павінны бачыць, шанаваць. Ні ў якім разе не выкідваць яе кудысьці за борт.
Я, калі чую некаторыя выпады балтыйскіх дзяржаў, Украіны ў плане тое разбурыць, гэта разбурыць, і Айчынная вайна – гэта не тое, што для нас, па-зямнаму думаю: навошта вы вялікую годнасць свайго народа выкідваеце на сметнік? Вы навошта гэта робіце? Гэтым трэба ганарыцца”, – сказаў ён.
“Мы ўвогуле не дзялілі Мурманскую вобласць з Беларуссю, асабліва што тычыцца ваенна-марскога флоту. Як на Балтыцы, так і ў вас служылі нашы хлопцы з Беларусі. І яны ганарацца гэтым”, – дадаў Лукашэнка.
