Александр Лукашенко. Фото: president.gov.by
Аляксандр Лукашэнка павіншаваў народ Германіі з Днём германскага адзінства. Кіраўніцтва Германіі, якую Мінск адносіць да «недружалюбных краін», у звароце не згадваецца.
«Нямецкі народ зрабіў практычна немагчымае — аб’яднаў падзеленыя сем’і і ліквідаваў ранейшыя межы. Беларусь добра разумее ўсю складанасць гэтага працэсу, — прыводзіць словы віншавання прэс-служба Лукашэнкі. — Пасля заканчэння Другой сусветнай вайны, якая прынесла смерць і смутак мільёнам беларусаў, быў дасягнуты значны прагрэс у прымірэнні нашых народаў, стварэнні падмурка для мірнага суіснавання і супрацоўніцтва».
На думку Лукашэнкі, дзеянні «асобных палітыкаў» Германіі і іншых заходніх краін «падрываюць дасягненні» папярэдніх гадоў. Ён выказаў надзею, што жыхары Беларусі і Германіі змогуць пераадолець сучасныя выклікі і «змогуць адстаяць сваё права жыць і сябраваць» у мірнай Еўропе.
«Наша краіна заўсёды была і застаецца адкрытай да канструктыўнага дыялогу. Запрашаю грамадзян Германіі наведваць Беларусь у рамках бязвізавага ўезду, каб адчуць гасціннасць і міралюбнасць беларусаў, а таксама ўбачыць на ўласныя вочы прыгажосць беларускай зямлі», — заявіў ён, пажадаўшы нямецкаму народу «упэўненасці ў сонечнай будучыні, шчасця і росквіту».