Фото: VSAT
Літоўскія памежнікі ў аўторак, 15 верасня, затрымалі шэсць чалавек у рамках двух расследаванняў аб незаконным абароце падакцызных тавараў і злоўжыванні службовымі паўнамоцтвамі. Трое затрыманых — супрацоўнікі Службы аховы дзяржаўнай мяжы Літвы (VSAT), паведаміла прэс-служба ведамства.
У рамках дасудовага расследавання ў аўторак раніцай у Алітусе быў затрыманы мужчына, а ў Лаздзійскім раёне — малодшы спецыяліст Кабельскай памежнай заставы Варэнскай памежнай акругі, які ў той момант не знаходзіўся пры выкананні службовых абавязкаў.
На мінулым тыдні ў рамках гэтага ж расследавання памежнікі затрымалі сем чалавек, у тым ліку трох памежнікаў.
Таксама ў аўторак у Варэнскім раёне была праведзена аперацыя, падчас якой былі выяўленыя і канфіскаваныя 6 тысяч пачак беларускіх цыгарэт.
Па гэтай справе пачата дасудовае расследаванне па падазрэнні ў незаконным абароце падакцызных тавараў і злоўжыванні службовымі паўнамоцтвамі.
Затрыманыя двое мужчын, падазраваных у кантрабандзе, а таксама старшы памежнік і малодшы спецыяліст Пурвенскай памежнай заставы Варэнскай памежнай акругі. У момант затрымання абодва знаходзіліся пры выкананні службовых абавязкаў.