Фото: strazgraniczna.pl
У Польшчы спынілі фургон-рэфрыжэратар з 34 мігрантамі. Як высветлілася, раней яны падалі заявы на міжнародную абарону ў Латвіі.
Польскія памежнікі спынілі грузавік на трасе пад Познанню 14 верасня. Пра магчымае перамяшчэнне мігрантаў іх папярэдзілі калегі з Падляскага аддзялення памежнай службы.
У фургоне-рэфрыжэратары за спецыяльнай перагародкай ехалі 34 мігранты — грамадзяне Пакістана, Егіпта, Самалі, Судана, Эфіопіі, Туніса і Эрытрэі. У іх былі дакументы, якія пацвярджаюць падачу заяў аб прадастаўленні міжнароднай абароны на тэрыторыі Латвіі, паведамляе Памежная служба Польшчы.
Нагадаем, Латвія сутыкнулася з павышаным міграцыйным ціскам на беларускай мяжы з ліпеня. Латвійскую мяжу штурмавалі дзясяткі мігрантаў у дзень. На тэрыторыі Латвіі дзейнічае аперацыя «Пярэварацень», накіраваная на барацьбу з нелегальнай міграцыяй.