Фото: European Union, 2022
Еўрасавет у панядзелак падоўжыў на два гады мандат Місіі Еўрапейскага саюза па ваеннай дапамозе Украіне. Ён будзе дзейнічаць да 15 лістапада 2028 года. Бюджэт місіі складзе амаль 300 млн еўра.
У рамках місіі ў тым ліку ажыццяўляецца падрыхтоўка ўкраінскіх вайскоўцаў. З 2022 года яе прайшлі больш за 100 тыс. чалавек.
“Савет таксама прыняў рашэнне аб устанаўленні прысутнасці ва Украіне для забеспячэння прамой і эфектыўнай каардынацыі з украінскімі ваеннымі ўладамі, Паветранымі сіламі Украіны і міжнароднымі партнёрамі-аднадумцамі, тым самым гарантуючы, што падрыхтоўка ў рамках ЕС будзе працягваць развівацца ў адпаведнасці з патрэбамі Паветраных сіл Украіны. Мандат місіі таксама пашыраецца з мэтай засяроджвання ўвагі на ўроках, вынесеных з баявых дзеянняў, і на ўмацаванні ваеннай падрыхтоўкі ў падтрымку абароннай праграмы Украіны”, – гаворыцца ў паведамленні Еўрасавета.
Місія таксама працягне супрацоўніцтва з партнёрамі, у лік якіх уваходзяць ЗША, Вялікабрытанія, Канада і Нарвегія. Яна таксама будзе супрацоўнічаць з Кааліцыяй ахвотных і НАТА.