Ціханоўская ўзняла пытанне становішча беларусаў у Грузіі на сустрэчы з Кабахідзэ

Святлана Ціханоўская абмеркавала з прэм’ер-міністрам Грузіі Іракліем Кабахідзэ і міністрам замежных спраў Макай Бачарышвілі праблемы беларусаў, якія жывуць у Грузіі. Размова адбылася на палях саміту Еўрапейскай палітычнай супольнасці ў Дубліне, паведамляе Офіс лідара дэмсіл.

Ціханоўская звярнула ўвагу грузінскіх чыноўнікаў на цяжкасці, з якімі сутыкаюцца беларусы ў Грузіі, у тым ліку пры легалізацыі свайго знаходжання, афармленні дакументаў і атрыманні дазволаў на пражыванне. Яна таксама падкрэсліла важнасць абароны правоў беларусаў, якія былі вымушаныя пакінуць радзіму з-за палітычнага пераследу.

Грузія пасля 2020 года стала адным з напрамкаў эміграцыі для беларусаў, якія падвяргаюцца пераследу або асцерагаюцца рэпрэсій на радзіме. Аднак грузінскія ўлады не задаволілі ніводнага хадайніцтва беларусаў аб прадастаўленні прытулку.