Беларусь і Манголія падпісалі план супрацоўніцтва на два гады

Беларусь і Манголія падпісалі план супрацоўніцтва на два гады. Пра гэта заявіў Аляксандр Лукашэнка пасля заканчэння афіцыйных перамоў з прэзідэнтам Манголіі Ухнаагійн Хурэлсухам.

“Імпульс гэтаму працэсу нададуць падпісаныя пагадненні, перш за ўсё дарожная карта супрацоўніцтва Беларусі і Манголіі на 2027-2029 гады. Таксама мы з маім калегам дэталёва прааналізавалі ход выканання дамоўленасцей, дасягнутых ва Улан-Батары ў 2024 годзе. У асобных сферах, у прыватнасці па пастаўках харчавання, нам удалося прасунуцца дастаткова сур’ёзна. На траекторыю росту выйшла двухбаковае эканамічнае ўзаемадзеянне, аднак яго значны патэнцыял яшчэ трэба будзе рэалізаваць у поўнай меры”, – сказаў ён.

Лукашэнка і Хурэлсух таксама абмяняліся ратыфікацыйнымі граматамі Дагавора аб дружалюбных адносінах і супрацоўніцтве паміж дзвюма краінамі, які быў падпісаны ў 2024 годзе.

“Сёння мы намецілі далейшыя ключавыя пункты росту ў беларуска-мангольскім супрацоўніцтве. Перш за ўсё гэта прамысловая кааперацыя”, – дадаў Лукашэнка.

Раней ён заяўляў пра пастаўкі ў Манголію сельскагаспадарчай, пасажырскай і кар’ернай тэхнікі. Пры гэтым разглядаюцца праекты па яе зборцы ў Манголіі.

Акрамя плана супрацоўніцтва, былі падпісаныя і іншыя дакументы:

• дарожная карта па развіцці супрацоўніцтва ў сферы сельскай гаспадаркі ў 2027-2029 гадах,
• мемарандум у сферы лёгкай прамысловасці,
• пагадненні паміж мытнымі ведамствамі аб узаемным прызнанні інстытутаў упаўнаважанага эканамічнага аператара.
  мемарандум аб узаемаразуменні паміж Беларускім дзяржаўным цэнтрам акрэдытацыі і Нацыянальным цэнтрам акрэдытацыі Манголіі,
• пагадненне аб супрацоўніцтве ў гандлёва-эканамічнай, навукова-тэхнічнай, гуманітарнай і культурнай сферах паміж Гомельскім аблвыканкамам і адміністрацыяй Баянхонгорскага аймака,
• пагадненне паміж Магілёўскай вобласцю і аймакам Хэнцій аб гандлёва-эканамічным, навукова-тэхнічным, культурным, адукацыйным і сельскагаспадарчым супрацоўніцтве.
• мемарандум аб супрацоўніцтве паміж Нацыянальнай дзяржаўнай тэлерадыёкампаніяй Беларусі і Мангольскай нацыянальнай грамадскай тэлерадыёкампаніяй.