Фото: БКК
Беларусь адправіць у ЗША яшчэ адну партыю калійных угнаенняў. Пра гэта паведаміў пастаянны прадстаўнік Беларусі ў ААН Валянцін Рыбакоў.
“У найбліжэйшай перспектыве, відавочна, будзе накіраваны наступны груз на рынак ЗША”, – сказаў ён, перадае БелТА.
Нагадаем, раней паведамлялася, што сухагруз з 30 тыс. т беларускіх калійных угнаенняў быў адпраўлены ў порт Новага Арлеана. Паводле інфармацыі СМІ, ён павінен быў прыбыць туды на мінулым тыдні. Рыбакоў пацвердзіў, што ўгнаенні дастаўлены ў ЗША.
“Адзін груз нашага калію ўжо знаходзіцца ў порце Новага Арлеана. Ён цалкам растаможаны і прыняты як беларускі прадукт. Гэта значыць, гэта канкрэтны практычны вынік зняцця амерыканцамі санкцый з нашай калійнай галіны”, – сказаў ён.
ЗША знялі санкцыі з “Беларуськалія” і “Беларускай калійнай кампаніі” вясной. На гэтым тыдні таксама былі знятыя санкцыі з гендырэктара “Беларуськалія” Андрэя Рыбакова.