Фото: fm.gov.om
Першы ў гісторыі пасол Амана з рэзідэнцыяй у Мінску неўзабаве прыбудзе ў Беларусь. Пра гэта на сустрэчы з кіраўніком МЗС Беларусі Максімам Рыжанковым паведаміў міністр замежных спраў Амана Бадр аль-Бусаідзі.
Сустрэча адбылася ў кулуарах 81-й сесіі Генеральнай Асамблеі ААН у Нью-Ёрку.
«Асноўную ўвагу на сустрэчы надалі рэалізацыі праграм двухбаковага супрацоўніцтва, эканамічнаму і інвестыцыйнаму партнёрству. Бакі абмеркавалі, як выкарыстоўваць сумесную камісію па супрацоўніцтве і інвестыцыях для прасоўвання праектаў і партнёрскіх сувязяў паміж профільнымі арганізацыямі дзвюх краін», — паведаміла прэс-служба МЗС Амана.
У МЗС Беларусі ўдакладнілі, што былі разгледжаныя «перспектывы рэалізацыі сумесных праектаў з удзелам аманскіх інвестыцый, уключаючы стварэнне зборачных вытворчасцей беларускай тэхнікі ў сферы вытворчасці харчавання і дзіцячага харчавання».
Міністры таксама разгледзелі магчымасці пашырэння гандлю і турыстычных абменаў «з улікам узаемнага спрашчэння паездак». Яны абмеркавалі шэраг рэгіянальных і міжнародных падзей, іх уплыў на бяспеку і эканоміку, а таксама важнасць урэгулявання пытанняў, якія ўзнікаюць, шляхам дыялогу і мірнымі сродкамі.
У МЗС Беларусі звярнулі ўвагу «на цікавасць аманскіх грамадзян да атрымання медыцынскіх паслуг у Беларусі», а таксама запуск прамых авіязносін паміж краінамі.
«Бадр аль-Бусаідзі паведаміў пра прызначэнне першага ў гісторыі пасла Амана з рэзідэнцыяй у Мінску і яго хуткае прыбыццё ў Беларусь», — расказалі ў беларускім знешнепалітычным ведамстве.
У паведамленні МЗС Амана тэма прызначэння пасла адлюстраваная не была.