Reform.news

Міністр абароны Польшчы звязаў залёт расійскіх ракет з вучэннямі Кааліцыі ахвотных

Рэдакцыя Reform.news · 20 лістапада 2026, 13:22

https://reform.news/be/ministr-abarony-polshchy-zvjaza-zaljot-rasijskih-raket-z-vuchjennjami-kaalicyi-ahvotnyh/

Міністр абароны Польшчы Уладзіслаў Касіняк-Камыш лічыць, што парушэнне паветранай прасторы краіны расійскімі ракетамі падчас сённяшняга налёту на Украіну не было выпадковасцю. Ён звязаў інцыдэнт з вучэннямі Кааліцыі ахвотных. Яны праходзяць на палігоне ў Нова-Дэмбе. Бакі адпрацоўваюць лагістыку магчымага разгортвання кааліцыйных сіл ва Украіне.

“Мы маем справу з чарговай правакацыяй Расійскай Федэрацыі. Дата, на мой погляд, не выпадковая. Сёння праходзяць вучэнні «кааліцыі ахвотных» — больш за дзесяць краін у Нова-Дэмбе, паблізу тых месцаў, дзе дзейнічалі нашы ваенна-паветраныя сілы”, – сказаў ён.

Паводле яго слоў, сёння на манеўрах будуць прысутнічаць міністры абароны Францыі, Вялікабрытаніі, краін Балтыі, восем начальнікаў штабоў з розных краін.

“Уяўляецца, што супадзенне гэтых падзей не выпадковае. Праз хвіліну я адпраўлюся — ніякім чынам не змяняючы тут ход дзеянняў «кааліцыі ахвотных» і вучэнняў, якія праводзяцца, вучэнні будуць праведзеныя, — я адпраўлюся да нашых саюзнікаў таксама з просьбай, каб яны ўбачылі, з чым мы тут кожны дзень, кожны тыдзень, кожны месяц на працягу чатырох гадоў сутыкаемся. Што сітуацыя з пагрозай для НАТА і правакацыямі з расійскага боку з’яўляецца вельмі сур’ёзнай”, – сказаў ён.

Міністр дадаў, што будзе прасіць генсека НАТА вылучыць дадатковыя сілы і сродкі для Усходняга флангу.

“Пра наўмыснасць мы пакуль сказаць не можам, паколькі заўсёды стараемся дакладна — максімальна дакладна, наколькі гэта магчыма, — інфармаваць вас, а таксама нашых саюзнікаў, таму гэта будзе высвятляцца. Асабіста я лічу невыпадковым супадзенне дзвюх акалічнасцяў: масіраваная атака і вучэнні «кааліцыі ахвотных» склаліся, на мой погляд, у прывабную для Расійскай Федэрацыі карціну, якая дазваляе трансляваць заходняму свету пасыл: «не варта дапамагаць Украіне». Гэта галоўны мэсэдж, які Расійская Федэрацыя прасоўвае ўжо даўно — дэматываваць грамадства.

Бо гэтая інфармацыя разлічаная не толькі на ўрады або ўзброеныя сілы краін НАТА, але перш за ўсё з’яўляецца спробай адбіць у грамадства жаданне падтрымліваць Украіну, дапамагаць Украіне. Цяпер можа з’явіцца вельмі шмат дэзінфармацыі, пра гэта папярэджваюць кібер-войскі. Таксама праходзіць нарада камандуючых кібер-войскамі наконт дэзінфармацыі, якая можа ўзнікнуць у выніку гэтых дзеянняў.

Таму тут у нас няма ніякіх сумненняў, што за гэтымі атакамі стаіць Расійская Федэрацыя. Наўмыснасць будзе расследавацца. Калі наўмыснасці не было, павінны быць прынесеныя прабачэнні з боку Расійскай Федэрацыі. Мы будзем пра ўсё інфармаваць нашых саюзнікаў”, – дадаў ён у адказ на ўдакладняльнае пытанне.

Рэклама

Пакінуць адказ