Відэа, ад якога мурашкі: што робіцца ў салігорскім доме са смеццеправодам

Рэдакцыя Reform.news · 13 лістапада 2026, 22:44

https://reform.news/be/vidjea-ad-jakoga-murashki-shto-robicca-saligorskim-dome-sa-smeccepravodam/

Салігорская газета «Шахцёр» апублікавала ў Instagram кадры са смеццекамеры дома на вуліцы Леніна, 43. Прамень ліхтарыка выхоплівае з цемры зялёны кантэйнер пад трубой смеццеправода: паверх пакетаў з адходамі шчыльнай кучай сядзяць дзясяткі пацукоў. Грызуны караскаюцца па сценках бака, уладкоўваюцца на яго бартах і не разбягаюцца нават ад святла.

Некаторыя каментатары засумняваліся, што відэа не згенеравана штучным інтэлектам. У адказ на іх скепсіс жыхарка дома прапанавала ўсім ахвотным зайсці ў смеццекамеру і праверыць:

„Там адчынены дзверы ў смеццеправод з боку вуліцы, зайдзіце самі паглядзіце… Пры мне смецце вывозілі, работнік кажа: «я туды не пайду, там іх штук 15, пацукоў»“. Салігарчанка дадала, што вельмі спачувае камунальнікам.

Адміністратар пабліка таксама са шкадаваннем адказаў, што відэа сапраўднае.

Жыхары дома звярталіся са скаргай у камунальныя службы на несвоечасовы вываз смецця, але адказная арганізацыя «ЭкоКомплексе» патлумачыла: адходы вывозяць паводле графіка, работнікі прыбіраюць нават тое, што аказваецца за межамі кантэйнераў, а якасць уборкі кантралююць майстры, але пакуль смеццеправод эксплуатуецца, у грызуноў заўсёды будзе чым пажывіцца.